Նոյեմբերի 17-ին Երեւանում կայացավ կլոր սեղան-քննարկում՝ «Եվրասիական ինտեգրացիան եւ տեղեկատվական տիրույթը» թեմայով:
Ռուսական եւ հայկական լրատվամիջոցներում գոյություն ունեցող խնդիրներից բացի, անդրադարձ եղավ նաեւ Ռուսաստանի կողմից Ադրբեջանին զենքի վաճառքի թեմային եւ հայկական լրատվամիջոցներում այս տեղեկության ներկայացման ձեւերին: Քննարկվեց նաեւ Եվրասիական տնտեսական հանձնաժողովի գործունեության լուսաբանման հարցը:
Հայաստանում գտնվելու երկու օրերի ընթացքում կլոր սեղանի մասնակիցները հանդիպումներ են ունեցել հայկական բուհերի եւ տարբեր լրատվամիջոցների ներկայացուցիչների հետ:
Կլոր սեղանի կազմակերպիչների խոսքով, միջոցառման նպատակն է՝ Ռուսաստանի եւ Հայաստանի, ինչպես նաեւ ԵՏՄ մյուս երկրների մեդիահանրության, ազգային, պետական կառույցների, հասարակական կազմակերպությունների, բուհերի ներկայացուցիչների ուշադրությունը հրավիրել միասնական տեղեկատվական տիրույթի եւ ռուսերենի պահպանման խնդիրներին:
Միջոցառումների կազմակերպիչն է Հեռուստատեսության եւ ռադիոյի միջազգային ակադեմիան՝ Տպագրության եւ զանգվածային հաղորդակցությունների Դաշնային գործակալության աջակցությամբ: Տեղեկատվական գործընկերներն են Ռուսաստանի Հանրային հեռուստատեսությունը, Հայաստանում Ռուսաստանի դեսպանատունը, Երեւանում Գիտության եւ մշակույթի ռուսական կենտրոնը: Տեղեկատվական անվտանգության գծով գլխավոր գործընկերն է «Կասպերսկիի լաբորատորիա» ընկերությունը:
