ՀՀ խորհրդարանը Ղազախստանի՝ Առեւտրի համաշխարհային կազմակերպությանն անդամակցելու շրջանակներում վավերացրել է արձանագրությունը։ Փաստաթուղթը, որը 2015թ. հոկտեմբերի 15-ին ստորագրվել էր Ղազախստանի Բուրաբայ քաղաքում, ընդունվել է 98 կողմ եւ 6 դեմ ձայներով։ Ձեռնպահ քվեարկողներ չեն եղել, հայտնում է  NEWS.am-ի թղթակիցը։

«ԵՏՄ մաքսային տարածքում ապրանքների ներմուծման եւ շրջանառության որոշ հարցերի մասին» արձանագրության նպատակն է բացառել ԱՀԿ-ին Ղազախստանի անդամակցության արդյունքում ԵՏՄ-ի համար բացասական հետեւանքները։ Այն դեպքերում, երբ ԱՀԿ ընթացակարգերում Ղազախստանի ընդունած մաքսային տուրքերն ավելի ցածր են, քան միասնական եվրասիական տուրքերը, այդ ապրանքների շրջանառությունը կթույլատրվի միայն Ղազախստանի տարածքում։