Սիրիայում միշտ էլ կա ռազմական էսկալացիայի սպառնալիք: Խոսքը ոչ թե միտումնավոր, այլ պատահական էսկալացիայի մասին է: Այս մասին նոյեմբերի 24-ին լրագրողներին հայտնել է Տարածաշրջանային հետազոտությունների կենտրոնի տնօրեն, վերլուծաբան Ռիչարդ Կիրակոսյանը՝ անդրադառնալով այն հարցին, որ թուրքական ԶՈւ ոչնչացրել են Սիրիայի օդային տարածքով թռչող ռուսական ռազմական օդանավը:
Այդ սպառնալիքը, նրա խոսքով, կա ոչ միայն թուրքական ու ռուսական զինված ուժերի՝ այլեւ ամերիկյան եւ «Իսլամական պետություն» խմբավորման դեմ պայքարող մյուս դաշնակիցների զինված ուժերի միջեւ: «Հայաստանում ռուսական ռազմակայանը կօգտագործվի Սիրիայում ռուսական օդային արշավին օպերացիոն աջակցություն ապահովելու նպատակով: Բայց դա պարտադիր չէ, որ վատ լինի, դա նշանակում է, որ Հայաստանը մեծ նշանակություն կունենա »,- շեշտել է Ռիչարդ Կիրակոսյանը:
Նշենք, որ Սիրիայում, Թուրքիայի հետ սահմանից ոչ հեռու ոչնչացվել է ռուսական «Սու 24» օդանավը: Ենթադրվում է այն գետնից է գնդակոծվել: Ըստ Ռուսաստանի Պաշտպանության նախարարության՝ ոչնչացված օդանավը գտնվում էր բացառապես Սիրիայի տարածքում: Դա արձանագրված է վերահսկողության օբյեկտիվ միջոցներով: Թուրքական առաջատար լրատվամիջոցները նախ հայտնել էին, որ թուրքական ՌՕՈւ երկրի օդային տարածքի խախտման պատճառով են կրակել ռուսական օդանավի վրա, իսկ հետո էլ գրել, որ ոչնչացվել է Սիրիայի ՌՕՈւ ռուսական արտադրության օդանավը: Թուրքիայի վարչապետ Ահմեդ Դավուդօղլուն միջադեպի կապակցությամբ շտապ խորհրդակցություն է գումարել գլխավոր շտաբի ղեկավարության հետ:
