Brent տեսակի նավթի գները 2 տոկոսով աճել են ՌԴ նախագահ Վլադիմիր Պուտինի այն հայտարարության ֆոնին, թե Թուրքիայի ՌՕՈւ կողմից ռուսական ռազմական օդանավը խոցելը ահաբեկիչների աջակիցների կողմից մեջքին հասցված հարված էր, հայտնում է Bloomberg-ը։
Երեւանի ժամանակով ժամը 16։54-ին Brent տեսակի նավթի հունվարյան մատակարարումները թանկացել էին մինչեւ 45.66 դոլար, փոխանցում է «Ինտերֆաքս»-ը։
WTI տեսակի հունվարյան մատակարարումները նույն ժամանակահատվածում թանկացել են 1.7 տոկոսով եւ կազմել 42.47 դոլար մեկ բարելի դիմաց։
Ընդ որում համաշխարհային ֆոնդային բորսաները Պուտինի հայտարարությունից հետո ուժեղացրել են անկումը։
Stoxx Europe 600 եվրոպական ազատ բորսան Երեւանի ժամանակով ժամը 16։47-ին 1.6 տոկոսով անկում է գրանցել՝ հասնելով 374.32 կետի։ Ամերիկյան ֆոնդային բորսաների ֆյուչերսները միջինում նվազել են 0.7 տոկոսով։
Թուրքական լիրան ԱՄՆ դոլարի նկատմամբ էժանացել է 0.7 տոկոսով, իսկ ռուբլու փոխարժեքը՝ 0.3 տոկոսով։
ՌԴ ՊՆ-ն հաստատել էր, որ Սիրիայի եւ Թուրքիայի սահմանին այսօր խոցվել է ռուսական ՍՈւ-24 ռմբակոծիչը։ Նախնական տեղեկություններով՝ 2 օդաչուներից մեկը զոհվել է։ Վլադիմիր Պուտինը հայտարարել էր, որ ռուսական ռմբակոծիչի կործանումը, որը խոցվել էր թուրք-սիրիական սահմանին, լուրջ հետեւանքներ է ունենալու ռուս-թուրքական հարաբերությունների համար։
