Ճապոնական Միկասա արքայազնը` Ակիհիտո կայսեր հորեղբայրը, չորեքշաբթի իր հարյուրամյակն է նշել, տեղեկացրել է Կիոդո գործակալությունը:
Կայսրական ընտանիքի ավագ անդամ Միկասա արքայազնը Ճապոնիայի արդեն երրորդ կայսեր օրոք է ապրում եւ լավ հիշում է իր բանակային ծառայությունը Երկրորդ համաշխարհայինի ընթացքում:
«Ես արդեն 100 տարեկան եմ, բայց հազիվ թե դրա պատճառով ինչ-որ բան փոխվի: Ես կուզեի օրերս անցկացնել խաղաղության մեջ` աղոթելով մարդկանց առողջության համար ամբողջ աշխարհում եւ արժանին մատուցելով կնոջս` Յուրիկոյին 70 տարվա աջակցության համար», — ասված է արքայազնի հայտարարության մեջ, որ տարածել է գործակալությունը, տեղեկացնում է «ՌԻԱ Նովոստին»:
2012-ին Միկասա արքայազնը սրտի վիրահատություն է տարել, այժմ իրեն լավ է զգում եւ ամեն օր մինչեւ կես ժամ ֆիզիկական վարժություններ է կատարում, տեղեկացնում է գործակալությունը: Նա նաեւ թերթեր է կարդում, հեռուստացույցով սումոյի մրցապայքարներ եւ երաժշտական հաղորդումներ է դիտում, սակայն զբոսնում է հաշմանդամի սայլակով:
Միկասա արքայազնը ծնվել է 1915-ի դեկտեմբերի 2-ին, նա Թայսե դարաշրջանի կայսեր չորրորդ որդին էր: Նրա ավագ եղբայրը` Հիրոհիտոն Ճապոնիայի կայսր է դարձել եւ իշխել է Սյովա դարաշրջանում (1926-ի դեկտեմբերի 25-ից մինչեւ 1989-ի հունվարի 7-ը):
Արքայազնն ու կինը` Յուրիկոն երեք որդի եւ երկու դուստր ունեն: Միկասան հայտնի է որպես Արեւելքի պատմության մասնագետ եւ Ճապոնիայի Մերձավորարեւելյան մշակույթի կենտրոնի պատվավոր նախագահն է:
