Թուրքիան որոշակի լծակներ կօգտագործի, որպեսզի ղարաբաղյան հակամարտության շփման գծում խախտումներ սադրի։ Այս մասին դեկտեմբերի 2-ին՝ «Ռուսաստան-Թուրքիա հարաբերությունների սրման ազդեցությունը Հարավային Կովկասի տարածաշրջանի վրա» թեմայով քննարկման ժամանակ, լրագրողներին ասել է ՀՀ պաշտպանության նախկին նախարար Վաղարշակ Հարությունյանը։
Նրա խոսքով՝ դա Թուրքիայի ռազմավարությունն է, որը բխում է Անկարայի շահերից։ «Սակայն Ադրբեջանն ու Ալիեւը չեն գնա լայնամասշտաբ պատերազմի, քանի որ վերջինս լավ գիտի իր հնարավորությունները։ Մեր բանակը պետք է ցույց տա իր մարտունակությունը»,- ընդգծել է Հարությունյանը։
Նա հավելել է, որ Ռուսաստանն ու Հայաստանը գործողություններ են պլանավորել ՀՕՊ միասնական համակարգի շրջանակներում. հանրապետությունում հակաօդային պաշտպանության նոր համակարգեր կտեղակայվեն։ «Կուժեղացվի օդային բաղադրիչը, կմատակարարվեն Մի-24 եւ Մի-8 ուղղաթիռներ։ Դա կուժեղացնի Հայաստանում ռուսական ռազմաբազան՝ Ադրբեջանի բոլոր հնարավոր գործողությունները կանխելու համար»,- եզրափակել է Վաղարշակ Հարությունյանը։
