«Երեւան մոլ» առեւտրի կենտրոնում այսուհետ կինոթատրոն կգործի: «Կինոպարկ» կինոթատրոնի բացումը տեղի ունեցավ այսօր՝ դեկտեմբերի 5-ին, նախագահ Սերժ Սարգսյանի, Մշակույթի նախարար Հասմիկ Պողոսյանի մասնակցությամբ:
«Ունենք 6 կինոսրահ, առաջինը՝ պրեմիում սրահն է, 30 տեղանոց ու գերհարամարվետ: Բոլոր սրահները այնպես են արված, որ լինեն հարմարավետ: Մյուս 4 կինոսրահները 119 տեղ ունեն, 6-րդը՝ 125 նստատեղ ունի, դրանում ձայնային համակարգն ավելի ժամանակակից է, ավելի լավ է փոխանցում ֆիլմի միջավայրը»,- NEWS.am-ին ասաց կինոթատրոնի տնօրենը՝ Վազգեն Սաղաթելյանը:
«Կինոպարկ»-ը հագեցած է գերմանական «Դիսինեքս» ֆիրմայի ժամանակակից կինոտեխնիկայով՝ 4K ULTRA HD որակի էկրաններով եւ «Դոլբի Աթմոս» ձայնային համակարգով: Կինոթատրոնի բոլոր սրահներում ֆիլմերը ցուցադրվելու են 3D ձեւաչափով:
Կինոթատրոնում ցուցադրվող ֆիլմերի տոմսերը հնարավոր է ձեռք բերել նաեւ առցանց: