Թուրքիայի ու Իսրայելի հարաբերությունները երկար պատմություն ունեն: NEWS.am–ի թղթակցի հետ զրույցում նման տեսակետ է հայտնել Մոսկվայի միջազգային հարաբերությունների պետական ինստիտուտի ռազմաքաղաքական հետազոտությունների կենտրոնի առաջատար փորձագետ, քաղաքական գիտությունների դոկտոր Միխայիլ Ալեքսանդրովը՝ պատասխանելով համատեղ տնտեսական նախագծեր իրականացնելու վերաբերյալ Թուրքիայի ու Իսրայելի մտադրության մասին հարցին:
Նրա խոսքով, հարաբերությունների որոշ սառեցում է եղել վերջին տարիներին՝ Էրդողանի վարած նեոօսմանիզմի քաղաքականության պատճառով:
«ԻՊ –ի հարցում նրանց շահերը համընկնում են: Իսրայելին այն պետք է, որպեսզի շրջապատի ու չեզոքացնի Իրանին ու տրոհի սիրիական առանցքը: Թուրքիային նույնպես ԻՊ –ն պետք է, քանի որ այն օգնում է ոչնչացնել սիրիական պետությունը ու այնտեղ խամաճիկային ռեժիմ հաստատել՝ փաստորեն իրականացնել Էրդողանի նեոօսմանյան ծրագրերը: Այս համատեքստում պատահական չէ, որ Իսրայելի ու Թուրքիայի միջեւ ռազմավարական համագործակցությունը վերականգնվել է»,- նշեց փորձագետը՝ հավելելով, որ քանի որ ոչ մի նոր բան չկա, ուրեմն մտահոգության նոր առիթ էլ չկա: Նրա խոսքով, Իսրայելն իհարկե կարող է Թուրքիային որոշ ռազմական տեխնոլոգիաներ տրամադրել՝ օրինակ անօդաչուների կամ էլ հակահրթիռային պաշտպանության համակարգերի տեխնոլոգիաներ, բայց դա չի կարող այս տարածաշրջանում լրջորեն խախտել ուժերի հավասարակշռությունն ի օգուտ Թուրքիայի:
«Ռուսաստանն առաջվա պես կպահպանի իր ռազմական գերազանցությունը Թուրքիայի նկատմամբ, այնպես որ Հայաստանը վախենալու առանձնապես շատ բան չունի: Սակայն Անկարա- Թել Ավիվ առանցքը որոշակի սպառնալիք է ներկայացնում հայկական շահերի համար»,- նշեց փորձագետը: