Իրանի դեմ պատժամիջոցները չեղարկելը Հայաստանի համար լրջագույն հնարավորություններ է բացում, բայց դա չի նշանակում, որ երկիրը կարող է անվերապահորեն օգտվել դրանցից։ Այս մասին հունվարի 18-ին կայացած մամուլի ասուլիսի ժամանակ ասել է «Մոդուս Վիվենդի» վերլուծական կենտրոնի ղեկավար Արա Պապյանը։
Նրա խոսքով՝ ինտենսիվ աշխատանքներ պետք է տանի ինչպես հայկական բիզնեսը, այնպես էլ պետությունը։ «Իրանի դեմ պատժամիջոցները չեղարկելու արդյունքում Հայաստանի դերը կմեծանա, քանի որ Իրանի համար դեպի Արեւմուտք տանող ամենահարմար ճանապարհը Հայաստանն է»,- նշել է Պապյանը։ Նա նաեւ հավելել է, որ Հայաստանի համար, իրենից անկախ, բացառապես բարենպաստ աշխարհաքաղաքական իրավիճակ է ստեղծվել, որից անհրաժեշտ է օգտվել։
Հիշեցնենք, որ հունվարի 16-ի երեկոյան ԱՄՆ-ն եւ ԵՄ-ն հանել էին Իրանի դեմ գործող պատժամիջոցներն այն բանից հետո, երբ ԱԷՄԳ-ը հայտարարել էր, որ Թեհրանը կատարել է միջուկային ծրագրով նախատեսված ապամոնտաժման բոլոր աշխատանքները։