Սիրիայի բանակը ահաբեկիչներից մի շարք գյուղեր է ազատագրել Լաթաքիայի շրջանում, այդ թվում հայաբնակ Ղնեմիե գյուղը: Ինչպես նշում է Սիրիայում լույս տեսնող հայկական «Գանձասար» շաբաթաթերթը, 4 տարի առաջ գյուղի բնակիչները ստիպված էին լքել իրենց տները՝ ահաբեկչական հարձակումների հետեւանքով:
Գյուղում է գտնվում 1875 թվականին կառուցված Սուրբ Գեւորգ հայկական եկեղեցին, սակայն հայերն այստեղ ապրել են եկեղեցու կառուցումից դեռ 300 տարի առաջ:
Հիշեցնենք, որ նախքան Սիրիայում արյունալի իրադարձությունները, այդ երկրում ապրում էր 60-70 հազար հայ: Նրանց մոտ կեսն ապրում էր Հալեպում, իսկ մյուս կեսը՝ Լաթաքիա, Հոմս, Ղամիշլի, Հասակե, Յակուբիա, Ռաքա, Քեսաբ բնակավայրերում եւ իհարկե, մայրաքաղաք Դամասկոսում: