Հայաստանի՝ տարանցիկ երկիր դառնալու հնարավորությունը շատ է մտահոգում Թուրքիային եւ Ադրբեջանին։ Այս մասին հունվարի 22-ին կայացած մամուլի ասուլիսի ժամանակ ասել է «Նորավանք» գիտակրթական հիմնադրամի ղեկավար, քաղաքագետ Գագիկ Հարությունյանը։
Նրա խոսքով՝ Թուրքիան եւ Ադրբեջանը կփորձեն ինչ-որ կերպ հակազդել ստեղված իրավիճակին։ «Իրանի դեմ պատժամիջոցները չեղարկելը Հայաստանի համար լուրջ գործոն է։ Մեր երկրի համար լուրջ հնարավորություններ են բացվում, խոսում են ազատ առեւտրի գոտի ստեղծելու մասին»,- նշել է Հարությունյանը։
Քաղաքագետը հավելել է, որ Իրանը տարբեր ոլորտներում, օրինակ, նանոտեխնոլոգիաների, միջուկային տեխնոլոգիաների ոլորտում, առաջատար դիրքեր ունի։ «Իրանի հետ հարաբերություններում մենք պետք է փորձենք համագործակցել գիտական բնագավառում։ Միայն գյուղատնտեսական արտադրանքով մենք շատ բանի չենք հասնի»,- հավելել է Գագիկ Հարությունյանը։
Հիշեցնենք, որ ԱՄՆ-ն եւ ԵՄ-ն հունվարի 16-ին չեղարկել էին Իրանի դեմ գործող պատժամիջոցներն այն բանից հետո, որ ԱԷՄԳ-ը հայտարարել էր, որ Թեհրանը կատարել է միջուկային ծրագրի բոլոր պայմանները։