ՀՀԿ-ն ավելի շուտ գնում է երկրում տիրող իրավիճակի համար պատասխանատվության իր բաժինը պակասեցնելու ճանապարհով։ Այս մասին փետրվարի 10-ին կայացած մամուլի ասուլիսի ժամանակ ասել է «Ժառանգություն» խմբակցության պատգամավոր Թեւան Պողոսյանը՝ անդրադառնալով ՀՀԿ-ՀՅԴ կոալիցիային։
Նա կոչ է արել մի քանի օր սպասել մինչեւ վերջնական նշանակումները։ «Հայաստանում հաջորդ շաբաթվանից կլինի կոալիցիոն կառավարություն։ Կարող է այդ կոալիցիան նպաստել տնտեսության ամրապնդմանը, Հայաստանի խնդիրների լուծմանը, ժամանակը ցույց կտա։ Հուսամ, որ ՀՅԴ-ում մեր գործընկերները լավ են հասկանում, որ խորհրդարանական ընտրություններից առաջ ընտրողները նրանց հաշիվ են ներկայացնելու»,- ընդգծել է Պողոսյանը։
Մյուս կողմից նա նշել է, որ այսօր տեղի ունեցող գործընթացները անդրադառնալու են կոալիցիոն կառավարման անցնելու մոդելի վրա։ «Մենք պետք է հասկանանք, որ սահմանադրական բարեփոխումները եւ կառավարման նոր մոդելը կարեւոր խնդիր են պարունակում՝ կիսել իրական պատասխանատվությունը։ Հուսամ, որ ՀՅԴ-ն նախորդ կոալիցիաներից դասեր քաղել է, միգուցե այդ պատճառով բանակցություններն այդքան երկար են տեւում։ Նրանք պետք է հասկանան, թե ինչ պատասխանատվություն են ստանձնում»,- հավելել է Թեւան Պողոսյանը։
