Հայ հեղափոխական դաշնակցության եւ Հանրապետական կուսակցության համագործակցության արդյունքում Հայաստանում սպասվում են մի շարք փոփոխություններ: Այս մասին այսօր` փետրվարի 11-ին, լրագրողների հետ հանդիպմանն ասաց ԱԺ ՀՀԿ խմբակցության պատգամավոր Լեռնիկ Ալեքսանյանը` նշելով, որ ՀՅԴ-ն Հանրապետական կուսակցության համար այսօր վստահելի քաղաքական ուժ է եւ ՀՀԿ-ն պատրաստ է համագործակցել այդ քաղաքական ուժի հետ:
«Եթե մի կուսակցություն, քաղաքական ուժ ինչ-որ մի առանցքի շուրջ փորձում է համագործակցել, մեր կուսակցությունը բաց է համագործակցության համար: ՀՅԴ-ն պատահական կուսակցություն չէ, ես մինչեւ մեր անկախությունը ճանաչում եմ մի քանի կուսակցություն, որոնք ունեն լավ գաղափարախոսություն, դրանցից մեկը Դաշնակցությունն է»,-ասաց նա:
Պատգամավորի խոսքով, պետք չէ մտածել, որ այն ուժը, որը համագործակցում է իշխանության հետ` պաշտոններ ստանալու ակնկալիքներ ունի:
«Իշխանությունների հետ համագործակցությունը ոչ թե ինչ-որ պաշտոններ ստանալու համար է, այլ համակարգային խնդիրներ լուծելու: Կան ընդհանուր խնդիրներ, որոնց շուրջ ընդհանուր հայացքներ կան այս երկու կուսակցությունների միջեւ, եւ եթե եւ ՀՀԿ-ն, եւ ՀՅԴ-ն, պահպանեն այն կետերը, կանոնները, որոնք համագործակցության համար կարեւոր են, կգնան առաջ, չեն պահպանի` չեն գնա»,-ասաց պատգամավորը:
Հիշեցնենք, որ ՀՅԴ–ն արդեն երկու անգամ կոալիցիոն իշխանության մաս է կազմել` Ռոբերտ Քոչարյանի օրոք 2003թ. եւ Սերժ Սարգսյանի նախագահ ընտրվելուց հետո` 2008թ.։ Վերջինից ՀՅԴ–ն դուրս եկավ` պատճառաբանելով, թե դեմ են Սերժ Սարգսյանի արտաքին քաղաքականությանը` մասնավորապես, հայ-թուրքական արձանագրություններին:
