ԵԽ-ն կշարունակի փորձագիտական օժանդակություն ցուցաբերել ՀՀ Սահմանադրության փոփոխություններով պայմանավորված: Այս մասին, այսօր՝ փետրվարի 16-ին, ՀՀ վարչապետ Հովիկ Աբրահամյանի հետ հանդիպման ժամանակ նշել է Հայաստանում Եվրոպայի խորհրդի (ԵԽ) գրասենյակի ղեկավար Նատալյա Վուտովան:
Կառավարությունից NEWS.am-ին հայտնում են, որ կառավարության ղեկավարն արդյունավետ է գնահատել Հայաստան-ԵԽ համագործակցությունը եւ կարեւորել կառույցի աջակցությունը մեր երկրում ընթացող ժողովրդավարական բարեփոխումներին: Վարչապետը նշել է, որ Հայաստանը ԵԽ ակտիվ անդամներից է եւ բոլոր մակարդակներում մասնակցում է կազմակերպության աշխատանքներին: Որպես ԵԽ հետ փոխգործակցության եւս մեկ հաջողված օրինակ՝ Հովիկ Աբրահամյանը նշել է Վենետիկի հանձնաժողովի ներգրավումը ՀՀ Սահմանադրության բարեփոխումների գործընթացին՝ Սահմանադրության հայեցակարգի եւ փոփոխությունների բուն տեքստի փորձաքննության միջոցով:
Գոհունակություն հայտնելով ՀՀ իշխանությունների եւ կառավարության հետ ԵԽ համագործակցության եւ ԵԽ մարմիններում Հայաստանի պատշաճ ներկայացվածության կապակցությամբ՝ տիկին Վուտովան նշել է, որ այն զարգացնելու լավ հնարավորություններ կան: ԵԽ գրասենյակի ղեկավարը բարձր է գնահատել 2013 թ. Հայաստանի նախագահությունը ԵԽ նախարարների կոմիտեում: Նա ընդգծել է, որ ԵԽ հայաստանյան գրասենյակի եւ ՀՀ տարբեր պետական ինստիտուտների հետ ձեւավորվել է արդյունավետ համագործակցություն, եւ ԵԽ-ն պատրաստ է շարունակել օժանդակել մեր երկրում իրականացվող բարեփոխումներին:
Զրուցակիցները երկկողմ գործակցության կարեւոր գործիք են համարել Հայաստան/Եվրոպայի խորհուրդ Գործողությունների ծրագրերը, որոնք շարունակական բնույթ ունեն (2009-2010 թթ., 2012-2014 թթ., 2015-2018 թթ.): Նշելով, որ ՀՀ շահառու գերատեսչությունները գոհ են 2012-2014 թթ. Գործողությունների ծրագրի ընթացքից եւ արդյունքներից, ինչպես նաեւ ԵԽ հայաստանյան գրասենյակի հետ աշխատանքից՝ վարչապետը կարեւորել է համագործակցության շարունակականությունը երկուստեք առաջնահերթություն հռչակված ոլորտներում:
Կողմերն անդրադարձել են 2015 թ. դեկտեմբերի 6-ի հանրաքվեով ընդունված ՀՀ Սահմանադրության փոփոխություններին: Հովիկ Աբրահամյանը նշել է, որ խորհրդարանական կառավարումը կնպաստի ժողովրդավարության զարգացմանը, եւ ՀՀ քաղաքական համակարգն առավել բաց եւ ճկուն կդառնա: Նատալյա Վուտովան էլ ընդգծել է, որ ԵԽ-ն կշարունակի փորձագիտական օժանդակություն ցուցաբերել ՀՀ Սահմանադրության փոփոխություններով պայմանավորված՝ ընդունման ենթակա իրավական ակտերի շրջանակի հստակեցման եւ օրենսդրության համապատասխանեցման գործընթացին:
Հանդիպմանն արծարծվել են ՀՀ Սահմանադրության բարեփոխումներով պայմանավորված ՀՀ Ընտրական օրենսգրքի փոփոխություններին վերաբերող հարցեր: Զրուցակիցները մտքեր են փոխանակել նաեւ Եվրոպայի խորհրդի խորհրդարանական վեհաժողովի շրջանակում համագործակցության վերաբերյալ:
