Իսրայելի նախագահ Շիմոն Պերեսը հաջորդ շաբաթ Նյու Յորքում հանդիպելու է Թուրքիայի նախագահ Աբդուլա Գյուլը, հաղորդում է Zaman-ը: Պարբերականը նշում է, որ դա կլինի Թուրքիայի եւ Իսրայելի նախագահների առաջին հանդիպումը` Գազայի հատված օգնություն տեղափոխող թուրքական նավատորմի վրա Իսրայելի հարձակումից հետո:
Zaman-ը` հղում անելով բարձրաստիճան անանուն աղբյուրին, նշում է, որ Գյուլն ու Պերեսը հանդիպելու են ՄԱԿ-ի Գլխավոր ասամբլեայի կուլիսներում եւ մեջբերել է Գյուլի խոսքերը, ըստ որոնց, «ԱԳ նախարարները կարող են հանդիպել թշնամական պետության ներկայացուցիչների հետ անգամ պատերազմի դաշտում»: Այս հայտարարությունը Գյուլն արել է Թուրքիայի ԱԳ նախարար Ահմեդ Դավութօղլուի եւ Իսրայելի առեւտրի եւ զբաղվածության նախարար Բինյամին Բեն-Էլիեզվերի հանդիպման առիթով:
Հատկանշական է, որ Էլիեզերն այդ հանդիպման ժամանակ Թուրքիան համարել է «բարեկամական երկիր» եւ կարեւորել բարիդրացիական հարաբերությունների վերականգնումը:
Ըստ Zaman-ի, Գյուլն այդ հանդիպման ժամանակ կրկին Իսրայելից պահանջելու է պաշտոնապես ներողություն խնդրել թուրքական նավախմբի վրա հարձակվելու համար, որի հետեւանքով 9 թուրք է զոհվել: Նա նաեւ հայտարարելու է, որ առանց Իսրայելի կողմից Թուրքիայի բոլոր պահանջները կատարելու, նորմալ փոխհարաբերություններ վերականգնելն անհնար է: Գյուլը նաեւ մտադիր է խնդրել ՄԱԿ-ից` ճնշում գործադրել Իսրայելի վրա:
Ի դեպ, թերթը գրում է, որ բժիշկները խորհուրդ չեն տալիս Գյուլին մեկնել Նյու Յորք, քանի որ նրա առողջությունը վերջին ժամանակներս վատացել է:
