Բրիտանական խորհուրդը, Beeline–ը եւ Երեւանում Բրիտանական դեսպանատունը հայտարարում են մարզերում Բրիտանական ֆիլմերի 14-րդ փառատոնի մեկնարկի մասին։ Փառատոնն այս տարի կրում է «Լավագույնը Բրիտանիայից» խորագիրը:

Մարտի ընթացքում փառատոնային ֆիլմերը կցուցադրվեն Դիլիջանում, Ապարանում եւ Ալավերդիում: Դիլիջանում ֆիլմերը ցուցադրությունը մեկնարկել է մարտի երկուսին։ Ցուցադրություններ կլինեն նաեւ մարտի յոթին եւ իննին, Ապարանում ֆիլմերը կներկայացվեն մարտի 11-ից 13-ը, իսկ Ալավերդիում`մարտի 16-ից 18-ը:

«Beeline-ի սոցիալական պատասխանատվության հիմնական նպատակն է իրականացնել այնպիսի ծրագրեր, որոնք կնպաստեն մարզերի հավասարաչափ զարգացմանը։ Հարուստ մշակութային կյանքը մարզերում  նպաստում է նորանոր անունների ի հայտ գալուն: Այդ իսկ պատճառով, մենք կարեւորում ենք, որպեսզի մարզերի երիտասարդները նույնպես հնարավորություն ունենան ծանոթանալու փառատոնի լավագույն ֆիլմերին եւ համաշխարհային զարգացման նոր միտումներին, իսկ իրենք էլ իրենց հերթին փորձեն խթանել հայրենական կինոարվեստի զարգացմումը՝ դարձնելով մարդկանց կյանքն էլ ավելի լավը»,- նշեց Հայաստանում Beeline-ի Գլխավոր տնօրեն Անդրեյ Պյատախինը:

«Փառատոնի հասանելիությունը մարզերում ապահովելը մեզ համար կարեւորագույն առաջնահերթություն է: Յուրաքանչյուր տարի մենք ընտրում ենք տարբեր մարզեր` հնարավորություն տալով բոլորին մասնակից դառնալ փառատոնին», - ասաց Բրիտանական խորհրդի հայաստանյան մասնաճյուղի տնօրեն Արեւիկ Սարիբեկյանը:

Բոլոր ցուցադրությունների մուտքն ազատ է:

Բրիտանական ֆիլմերի 14-րդ փառատոնի կազմակերպիչներն են Բրիտանական խորհուրդը եւ Երեւանում Բրիտանական դեսպանատունը, փառատոնի գլխավոր հովանավորն է Beeline-ը։ Փառատոնին աջակցում է ՀՀ Մշակույթի նախարարությունը: 

Բրիտանական ֆիլմերի 14-րդ փառատոնը Երեւանում մեկնարկել էր փետրվարի 20-ին եւ ցուցադրվել էր յոթ ֆիլմ:

Փառատոնի ինֆորմացիոն գործընկերներն են` Հանրային հեռուստաընկերությունը, Շողակաթ, Շանթ, Կենտրոն, Երկիր Մեդիա եւ Հ3 հեռուստաընկերությունները, Հանրային ռադիոն, Ռադիո Վանը, Ռադիո FM 105.5-ը, Իմ Ռադիո FM 103.8-ը, Ռադիո Երեւան FM 101.9-ը եւ AutoRadio FM 89.7-ը, Կինոաշխարհ կայքը եւ Սիվիլնեթը։