Եվրոպայի լիգայի 1/8 եզրափակչի շրջանակներում Դորտմոնդի «Բորուսիան» մարտի 10-ին տանը կընդունի լոնդոնյան Տոտենհեմին: Թեեւ Մխիթարյանի թիմն այստեղ ֆավորիտ է համարվում, նրան ծանր փորձություն է սպասվում: Թե ինչ մթնոլորտ է տիրում Դորտմունդում եւ ինչպիսին են սպասելիքները խաղից NEWS.am-ի թղթակից Վերա Մարտիրոսյանի հետ զրույցում պատմեց Դորտմունդի ամենահայտնի ֆուտբոլային լրագրողներից մեկը, Չեմպիոնների լիգայի պաշտոնական ամսագրի գլխավոր խմբագիրն Ուլի Հեսեն:
«Այս պահին Դորտմունդում հիանալի մթնոլորտ է տիրում, քանի որ այս մրցաշրջանը «Բորուսիայի» համար ֆանտաստիկ է անցնում: Շատերը սպասում էին, որ «Բորուսիայի» համար 2014/15 սարսափելի մրցաշրջանից հետո թիմը պետք է վերադառնա ավելի ուժեղ, բայց որ այսքան կուժեղանա, ոչ ոք չէր սպասում: Այս վերածննդի պատճառներից մեկը Հենրիխ Մխիթարյանը փայլուն մարզավիճակն է: Նա հանճարեղ է այս մրցաշրջանում: «Բորուսիայի» մարզիչ Թոմաս Տուխելն ասել է, որ «սիրահարված է» Մխիթարյանին եւ որ հայ ֆուտբոլիստի երկրպագուն էր մինչեւ Միկիի Դորտմունդ տեղափոխվելը: Նրանք երկար խոսակցություն էին ունեցել մրցաշրջանի մեկնարկից առաջ, եւ դա իր հետք էր թողել Մխիթարյանի վրա: Իհարկե, բոլորն ավելի շատ խոսում են Օբամեյանգի մասին, քանի որ նա այդքան շատ գոլեր է խփում, բայց բոլորը գիտեն, որ Մխիթարյանը նույնքան կարեւոր է:
«Տոտենհեմը» շատ ուժեղ մրցակից է: Խաղի արդյունքն անկանխատեսելի է: Երկրպագուների համար կրկնակի տոն է՝ «Բորուսիան» խաղալու է «Տոտենհեմի» հետ, իսկ Յուրգեն Կլոպի «Լիվերպուլը»՝ «Մանչեսթեր Յունայթեդի»: Այս խաղերը ավելի շատ կսազեն Չեմպինոների լիգայի խաղերին, քան հենց Լիգայի մի քանի իրական խաղերը: Երեւի հասկացաք՝ ինչ նկատի ունեմ»- ասաց Հեսեն:
Հիշեցնենք, որ «Բորուսիա» - «Տոտենհեմ» խաղը կսկսվի այսօր ժամը 22:00-ին:
Վերա Մարտիրոսյան / Vera&Football
