Պետք չէ միակողմանի քայլերի դիմել, որոնք բոլորին անհարմար վիճակի մեջ կդնեն։ Այս մասին մայիսի 16-ին խորհրդարանում ասել է ԱԺ Արտաքին կապերի մշտական հանձնաժողովի ղեկավար, ՀՀԿ անդամ Արտակ Զաքարյանը Ազգային ժողովի պատգամավորներ Զարուհի Փոստանջյանի եւ Հրանտ Բագրատյանի՝ օրենսդրական նախաձեռնության կարգով ներկայացրած «Արցախի Հանրապետությունը ճանաչելու մասին» օրենքի նախագիծը օրակարգում ներառելու հարցը քննարկելու ժամանակ։
Նրա խոսքով՝ ԼՂՀ-ն կայացած պետություն է։ Անգամ այնպիսի միջազգային կազմակերպություն, ինչպիսին Freedom House-ն է, իր մի շարք զեկույցներում նշել է այդ հանգամանքը՝ համեմատելով դա Ադրբեջանի հետ։ «Բայց հարցը դեռ հասունացման շրջանում է, եւ պետք չէ միակողմանի քայլերի դիմել, որոնք բոլորին՝ մեզ եւ մեր գործընկերներին, անհարմար վիճակի մեջ կդնեն, հնարավորություն չեն տա համապատասխան չափորոշիչներով եւ խաղաղ կարգավորման տրամաբանությամբ բոլորին միջազգային ճանաչման մասնակից դարձնել։ Հիմա մենք պետք է կենտրոնացնենք մեր ջանքերը դրա վրա»,- ասել է Զաքարյանը։