Երկրորդ օրն է՝ «Հարավային Կովկասում անվտանգության եւ տեղեկատվական համագորակցության խնդիրները» միջազգային կոնֆերանսի ժամանակ Երեւանում լեզվակռիվ է ընթանում «Էխո Մոսկվի» ռադիոկայանի լրագրող Մատվեյ Գանապոլսկու եւ հայ փորձագետների միջեւ, որոնք ռուս լրագրողի ելույթում հակահայկական ելեւէջներ են որսացել: Իր ելույթում Գանապոլսկին, մասնավորապես, դժգոհություն է հայտնել այն փաստի կապակցությամբ, որ Հայաստանում, որն իրեն համարում է Ռուսաստանի բարեկամական երկիր, ռուսերենով ոչ մի ցուցանակ փակցված չէ: «Ի՞նչ ես կարող եմ ասել Հայաստանի վերաբերյալ իմ ելույթում»,-հարց է հղել լրագրողը, ապա սահուն անցում կատարել ղարաբաղյան թեմատիկային եւ հայկական կողմի համար վիրավորական ձեւակերպումներ գործածել՝ «Լեռնային Ղարաբաղի ապուշ իրավիճակ»:
Այս ձեւակերպումը բուռն հակազդեցություն է առաջացրել քննարկման մասնակիցների շրջանում: Քննարկման մասնակից հայ փորձագետները՝ Ալեքսանդր Իսկանդարյանն ու Թեւան Պողոսյանը լրագրողին կոռեկտության կոչ են արել, նրան հիշեցնելով, որ նա հայկական հողում է եւ հայերով է շրջապատված: Փորձագետ Թեւան Պողոսյանը ռուս փորձագետին հայտնել է, որ Ղարաբաղը հրետանային գնդակոծման տակ է եղել եւ իր համար վիրավորական է լսել նրա հայտարարությունները: Սակայն հայ փորձագետների կոռեկտության կոչերը բնավ չեն ազդել ռուս լրագրողի վրա, ով կոչ է արել, որ իրեն չհրամայեն, թե որտեղ ինչ ասի: