Բելառուսի նախագահ Ալեքսանդր Լուկաշենկոն օրենք է ստորագրել Եվրասիական տնտեսական միության եւ Վիետնամի միջեւ ազատ առեւտրի վերաբերյալ, համապատասխան փաստաթուղթը երեքշաբթի հրապարակվել է Ազգային իրավական ինտերնետ-պորտալում:
«Վավերացնել Եվրասիական տնտեսական միության եւ նրա անդամ պետությունների` մի կողմից, եւ Վիետնամի Սոցիալիստական Հանրապետության միջեւ` մյուս կողմից, ազատ առեւտրի վերաբերյալ համաձայնագիրը», — ասված է փաստաթղթում:
Համաձայնագիրը ստորագրվել է 2015-ի մայիսին` Ղազախստանում: Այն ենթադրում է, որ նախ մաքսային տուրքերը կզրոյացվեն ապրանքների 60 տոկոսի համար, որոնց վերաբերյալ կողմերն առեւտուր են իրականացնում: Մինչեւ 2025 թվականը` բոլոր անցումային շրջանների ավարտից հետո մաքսային տուրքերի զրոյացման տակ կընկնի ապրանքների գրեթե 90 տոկոսը: Փաստաթուղթը չի սահմանափակում Վիետնամից ներմուծվող ապրանքների վրա ԵԱՏՄ-ի ստանդարտ պաշտպանական միջոցների կիրառությունը:
Օրենքի նախագիծն ընդունվել է Բելառուսի Ազգային ժողովի Ներկայացուցիչների պալատի կողմից` 2016-ի մայիսի 25-ին եւ հավանություն է արժանացել Հանրապետության Խորհրդի կողմից 2016-ի մայիսի 27-ին: