![](img/news/33/42/47/default.jpg)
ՀՀ ԳՆ սննդամթերքի անվտանգության պետական ծառայության հրավերով՝ հունիսի 21-24-ը Հայաստանում էր ՌԴ անասնաբուժական եւ բուսասանիտարական հսկողության դաշնային ծառայության պատվիրակությունը՝ ծանոթանալու Հայաստանում պտուղ-բանջարեղենի արտադրության ու պահման պայմաններին, ինչպես նաեւ արտահանման սերտիֆիկացան գործընթացներին:
Ծառայության պետ Արմեն Հայրապետյանի հետ հանդիպման ընթացքում մասնավորապես քննարկվել է բուսասանիտարական ենթահսկման բեռների՝ ՌԴ անխափան արտահանման հարցը, խոսվել է ԵՏՄ շրջանակներում համագործակցության ու հսկողության համատեղ միջոցառումների արդյունավետության մասին: Կարեւորվել է վերահսկողություն իրականացնող երկու կառույցների միջեւ ամենօրյա եւ սերտ փոխգործակցությունը, ինչը հնարավորություն կընձեռի արագ արձագանքել հնարավոր խնդիրների առաջացման դեպքում: Արմեն Հայրապետյանը նշել է, որ ներկայումս Հայաստանում ակտիվորեն ստեղծվում են ջերմոցային տնտեսություններ՝ նոր տեխնոլոգիաների կիրառմամբ, ինչը հայկական ծագման պտուղ-բանջարեղենը միջազգային շուկայում մրցունակ դարձնելու լավ հնարավորություն է ստեղծում:
Միայն 2016 թվականի տարեվերջին նախատեսվում է ջերմոցային տնտեսությունների տարածքներն ավելացնել եւս 70 հեկտարով:
Դաշնային ծառայության պատվիրակությունն այցելել է փակ գրունտում բանջարեղենի մշակմամբ զբաղվող մի շարք խոշոր ընկերություններ, ինչպես նաեւ՝ խնձորենու եւ ծիրանենու այգիներ: Ռուս մանագետները տեղում պարզել են, որ ջերմոցներում բանջարեղենի եւ հատապտուղների աճեցման ժամանակ օգտագործվում է վնասատու կարանտին օրգանիզմների դեմ պայքարի կենսաբանական միջոց, ինչն արտադրանքը դարձնում է էկոլոգիապես մաքուր:
Այցի շրջանակներում ՌԴ անասնաբուժական եւ բուսասանիտարական հսկողության դաշնային ծառայության պատվիրակությունը ծանոթացել է նաեւ ՍԱՊԾ «Հանրապետական անասնաբուժասանիտարական եւ բուսասանիտարական լաբորատոր ծառայությունների» կենտրոնի աշխատանքներին՝ հավաստիանալով, որ լաբորատորիայի նյութատեխնիկական հագեցվածությունը նորագույն սարք-սարքավորումներով եւ մասնագետների որակավորումը թույլ են տալիս ՀՀ-ում իրականացնել հետազոտություններ Եվրասիական տնտեսական միության արդի պահանջներին համապատասխան:
ՀՀ եւ ՌԴ բուսասանիտարիայի ոլորտի պատասխանատուները քննարկել են միասնական տնտեսական գոտում հետագա համագործակցության հնարավորություններն ու հեռանկարները: