Հուլիս 1-ից Սեւ ծովի տարածքից Հայաստանի Հանրապետություն  կներթափանցի ցիկլոնային դաշտ, որը գործելու է մինչեւ հուլիսի 8-ը: Այս մասին այսօր` հունիսի 30-ին, լրագրողների հետ հանդիպմանն ասաց ՀՀ ԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը` նշելով, որ այդ ցիկլոնն ունի այնպիսի առանձնահատկություն, որ հիմնականում երեկոյան ժամերին է ակտիվանալու:

Նա նշեց, որ հանրապետության որոշ հատվածներում օրվա առաջին կեսը կլինի առանց տեղումների, երկրորդ կեսին` անձրեւ եւ կարկուտ կլինի: Լոռու, Տավուշի եւ Շիրակի մարզերում, Արագածոտնի, Կոտայքի, Գեղարքունիքի մարզերի լեռնային գոտիներում ցիկլոնի ազդեցությունն ավելի սրված  կարտահայտվի, քան Արարատյան դաշտում: Տավուշի, Լոռիի եւ Շիրակի մարզերում  տեղումները կսկսվեն ոչ թե երեկոյան ժամերին, այլ` ցերեկը:

«Մինչեւ հուլիսի 5-ն ընկած ժամանակահատվածում օդի ջերմաստիճանը  աստիճանաբար կնվազի,  Երեւանում հուլիսի 1-ին կլինի 36 աստիճան տաքություն,  հուլիսի 2-ին` 35,  հուլիսի 4-ին՝ 34,  հուլիսի 5-ին` 33: Հուլիսի 5-ից հետո ջերմաստիճանը կմնա անփոփոխ, օդի ջերմաստիճանը կմոտենա նորմային եւ կունենանք այնպիսի եղանակ,  որը  համահունչ է մեր կլիմայական պայմաններին»,-ասաց նա: