Իրանի նախարարների կաբինետը որոշում է ընդունել «Հայաստանի Հանրապետության եւ Իրանի Իսլամական Հանրապետության միջեւ մուտքի արտոնագրային ռեժիմի վերացման վերաբերյալ»:
Իրանական Mehr գործակալության փոխանցմամբ, Իրանի կառավարությունը հուլիսի 10-ին, որոշում է կայացրել, ըստ որի մուտքի արտոնագիր այլեւս անհրաժեշտ չի լինի դիվանագիտական եւ սովորական անձնագիր, ինչպես նաեւ ճանապարհորդական փաստաթուղթ ունեցող՝ Հայաստանի եւ Իրանի քաղաքացիների համար:
Հիշեցնենք, որ ավելի վաղ` հունիսի 16-ին, Իրանի արտգործնախարար Մոհամադ Ջավադ Զարիֆն ու Հայաստանի արտգործնախարար Էդվարդ Նալբանդյանը ստորագրել էին համաձայնագիր՝ երկու պետությունների միջեւ վիզային ռեժիմի վերացման վերաբերյալ:
Այսպիսով, համաձայնագիրը, որն ավելի վաղ հավանության էր արժանացել Հայաստանի կառավարության կողմից, հուլիսի 10-ին հավանության է արժանացել նաեւ Իրանի կառավարության կողմից:
Հայաստանի եւ Իրանի քաղաքացիները, որոնք ունեն սովորական կամ դիվանագիտական անձնագրեր, կարող են մյուս երկրում մնալ առավելագույնը 90 օր:
