Հայտնաբերվել է Վանաձորում ոստիկանության քրեական հետախուզության օպեր-լիազոր, գնդապետ Մովսես Իսկանդարյանի մոր սպանություն կատարողը:
Հիշեցնենք, որ հոկտեմբերի 6-ին, ժամը 20.50-ին, շտապ օգնության կայանից ոստիկանության Վանաձորի բաժնում ահազանգ էր ստացվել, որ Զաքարյան փողոցի խանութներից մեկում կնոջ դիակ կա: Դեպքի վայր մեկնած օպերատիվ խումբը Զաքարյան փողոցի 8/11/Ա հասցեում գործող մթերային խանութում հայտնաբերել էր տնօրեն, 59-ամյա Սվետլանա Կազազյանի դիակը` պարանոցի մասում սուր-կտրող գործիքից ստացած կտրած-ծակած վերքի հետքով: Փաստի առթիվ ՀՀ քրեական օրենսգրքի 104 հոդվածի հատկանիշներով հարուցվել էր քրեական գործ:
Հոկտեմբերի 9-ին, ժամը 09.00-ին, ոստիկանության Լոռու մարզային քննչական բաժնից ստացված գրության համաձայն` ոստիկանության Լոռու մարզային վարչության եւ Վանաձորի բաժնի ծառայողների կողմից ձեռնարկված օպերատիվ-հետախուզական միջոցառումների շնորհիվ պարզվել է, որ սպանությունը կատարել է հոկտեմբերի 7-ին այլ հանցագործություն կատարելու համար ձերբակալված, նախկինում երեք անգամ ազատազրկման դատապարտված, 33-ամյա Սլավիկ Ո.-ն: Նախաքննությունը շարունակվում է:
Գնդապետ Մովսես Իսկանդարյանը չէր բացառել, որ մոր սպանությունը կապ ունի իր գործունեության հետ:
Բացի վրեժխնդրության վարկածից, ոստիկանությունը քննում է նաեւ պատվիրված սպանության, կենցաղային, խանութին պարտք լինելու եւ այլ հարցերի հետ կապված վարկածներ: Հատկանշական է, որ մարդասպանը խանութից ոչինչ չի վերցրել:
