![](img/news/03/47/27/default.jpg)
Թուրքիայի վարչապետ Ռեջեփ Թայիփ Էրդողանին անհանգստացնում է Վաշինգթոնի արձագանքը, կապված Գազայի հատվածի շրջափակումը ճեղքել փորձող «Ազատության նավատորմի» վրա Իսրայելի հարձակման հետ:
«Ազատության նավատորմի» հետ կապված դեպքը ցույց տվեց Վաշինգթոնի իրական դեմքը, որը բաց եւ առանց որեւէ ամոթի աջակցում է իսրայելական ահաբեկչությանը»,- հայտարարել է Էրդողանը պակիստանյան լրատվամիջոցներին տված հարցազրույցում: Նրա խոսքով, այսպիսով ԱՄՆ-ը «աջակցում է միջազգային ահաբեկչությանը»:
Անդրադառնալով Թուրքիայի եւ Իսրայելի միջեւ հարաբերություններին, Էրդողանը հայտարարել է, որ «չնայած երկարատեւ դիվանագիտական հարաբերություններին, Իսրայելը երբեք բարեկամաբար չի վարվել մեզ հետ»:
Ավելի վաղ NEWS.am-ը հաղորդել էր, որ The Financial Times-ի տեղեկություններով, ԱՄՆ-ը կոչ էր արել Անկարային փոխել իր դիրքորոշումը Իսրայելի նկատմամբ, հակառակ դեպքում Վաշինգթոնը կսահմանափակի զենքի մատակարարումը Թուրքիա: Այս սպառնալիքը Թուրքիայի համար շատ լուրջ է, քանի որ նա մտադիր էր ԱՄՆ-ից անօդաչու ինքնաթիռներ գնել քուրդ ապստամբների գործողություններին հետեւելու, ինչպես նաեւ PKK-ի բազաների վրա հարձակումներ գործելու համար:
Օբաման Անկարային կոչ է արել մեղմացնել իր տոնը «Ազատության նավատորմի» վրա իսրայելական հարձակման հետ կապված: Վաշինգթոնը նաեւ խստորեն դատապարտել է Անկարային, որ վերջինս դեմ է հանդես եկել Իրանի դեմ ՄԱԿ-ի պատժամիջոցների կիրառմանը:
Այս առնչությամբ, Թուրքիայի ԱԳ նախարարը հայտարարել է. «Ոչ մի երկիր իրավունք չունի Թուրքիային վերջնագրեր եւ նախազգուշացումներ ներկայացնել, առավել եւս, վարչապետի հասցեին»:Նա հերքել է տեղեկությունները, թե ԱՄՆ նախագահ Բարաք Օբաման սպառնացել է Թուրքիայի վարչապետ Ռեջեփ Թայիփ Էրդողանին` թուրք-իսրայելական հարաբերությունների սրացման կապակցությամբ: