Հայ -ամերիկյան հարաբերությունները դինամիկ են եւ 25 տարիների ընթացքում զարգացում են ապրել: Այս մասին «Ամերիկայի Ձայն»-ին ասել է ԱՄՆ-ում Հայաստանի դեսպան Գրիգոր Հովհաննիսյանը:
«Հայ-ամերիկյան հարաբերությունները երբեք նույն մակարդակի չեն մնացել, թեեւ այն արագությամբ, այն տեմպերով չեն զարգացել, որքան ես կցանկանայի, լինելով այստեղ դեսպան, սակայն դրական զարգացումներ եղել են: Այսօր էլ, թերեւս քաղաքական շփումների, այլցելությունների առումով գտնվում են ամենաբարձր մակարդակի վրա, շատ կարեւոր է դնել դրա մեջ նաեւ շոշափելի բովանդակություն՝ ապրանքների, ընկերությունների, համալսարանների, հանրության ներկայությունը Միացյալ նահանգներում եւ հակառակը»,- ասել է նա՝ նշելով, որ ԱՄՆ-ում հետաքրքրվածություն կա:
Գրիգոր Հովհաննիսյանը նշել է, որ այլ երկրների համեմատ ԱՄՆ-ում Հայաստանը գիտեն, ճանաչում են եւ ինքը շատ կցանկանար տեսնել ավելի մտերիմ հարաբերություններ այս երկու երկրների միջեւ:
«Մեր աշխատանքն էլ դրան նպաստելն է, դա բխում է մեր ազգային շահերից: Միացյալ նահանգները, թերեւս, մեր ժողովրդի մեկ քառորդի հայրենիքն է, դա չի կարող մեզ օտար լինել»,- ասել է նա:
