![](img/news/34/79/17/default.jpg)
Անցած տարվա դեկտեմբերի 9-ին ինքնասպանության փորձ կատարած ժամկետային զինծառայող Ռազմիկ Աբրահամյանի եւ նրա ծառայակից ընկերների գործով դատաքննությունը դեռ չի սկսել:
Դեռեւս երեք ամիս առաջ դատարան ուղարկված այս գործով որեւէ նիստ չի կայացել: Պատճառն այն է, որ պաշտպանները դատարան չեն ներկայանում: Նշենք, որ ամբաստանյալներն առաջին դատական նիստի ժամանակ հրաժարվել էին մասնավոր փաստաբաններից եւ պահանջել հանրային պաշտպաններ: Թե ինչու պաշտպանները չեն ներկայանում, պարզ չէ:
Ըստ մեղադրական եզրակացության` ժամկետային զինծառայողներ Ալբերտ Կարապետյանը, Սարգիս Մելքոնյանը, Վահրամ Տեր Վարդանյանը, Արկադի Ղազարյանը, Հարություն Միրզոյանը, Վահե Ղարիբյանն ու Զավեն Առաքելյանը զորամասի պահեստասենյակ-սպայական աշխատասենյակում բռնություն են գործադրել Արազ Ապրեսյանի նկատմամբ, որի ընթացքում ձեռքերով եւ ոտքերով հարվածներ են հասցրել նրա մարմնի տարբեր մասերին: Վիճաբանության մեջ են մտել զինծառայող Գրիգոր Բադոյանի հետ, բռնի գործողություններ կատարել նրա նկատմամբ:
Ինքնասպանության փորձ կատարած Ռազմիկ Աբրահամյանն էլ սուտ մատնություն է կատարել, իսկ Հովհաննես Եղիազարյանն էլ իրեն ամրակցված ԱԿՍ տեսակի ինքնաձիգը անփութորեն զորամասի հետախուզական վաշտի սպայական աշխատասենյակ է տեղափոխել եւ առանց հսկողության թողել այնտեղ:
Ալբերտը, Սարգիսն ու Վահրամը կալանավորված են, իսկ մյուսները գտնվում են հրամանատարության հսկողության տակ:
Գործը քննվում է Գեղարքունիքի մարզի ընդհանուր իրավասության դատարանում:
Ավելի վաղ քննչական կոմիտեն հայտնել էր, որ 2015 թվականի դեկտեմբերի 9-ին ՀՀ ՊՆ N զորամասից ժամը 12:15-ի սահմաններում կրծքավանդակի ձախ հատվածի հրազենային վնասվածք է ստացել պարտադիր ժամկետային զինծառայող, շարքային Ռազմիկ Նվերի Աբրահամյանը: Նույն օրը՝ ժամը 12:20-ի սահմաններում, Ռ.Աբրահամյանը տեղափոխվել է «Ճամբարակի առողջության կենտրոն» ՓԲԸ, այնուհետեւ՝ ՀՀ ՊՆ կենտրոնական կլինիկական զինվորական հոսպիտալ:
Դեպքի առթիվ հարուցվել է քրեական գործ Քրեական օրենսգրքի 359-րդ հոդվածի 3-րդ մասով, պարտադիր ժամկետային զինծառայողներ Ա. Կարապետյանը, Ս. Մելքոնյանը եւ Վ. Տեր-Վարդանյանը կալանավորված են:
Զինծառայողը նամակ է թողել հորը՝ հայտնելով, որ ինքնասպանության է դիմում համածառայակիցների պատճառով: