Նախագահ Սերժ Սարգսյանն այսօր ընդունել է ՄԱԿ-ի Զբոսաշրջության համաշխարհային կազմակերպության (ԶՀԿ) գլխավոր քարտուղար Թալեբ Ռիֆաիին:
Հանրապետության Նախագահը ողջունել է հյուրին Հայաստանում եւ բարձր գնահատել կազմակերպության՝ որպես զբոսաշրջության բնագավառում հիմնական միջազգային ֆորումի դերն ու նշանակությունը: Կարեւորելով կազմակերպության հետ մեր երկրի երկարամյա եւ արդյունավետ համագործակցությունը՝ Սերժ Սարգսյանը հույս է հայտնել, որ գլխավոր քարտուղար Թալեբ Ռիֆաիի հերթական այցը նոր խթան կհաղորդի այդ համագործակցության հետագա զարգացմանն ու խորացմանը:
Նախագահը ողջունել է ՄԱԿ-ի ԶՀԿ աֆիլացված անդամների 38-րդ նստաշրջանի անցկացումը Հայաստանում եւ նշել, որ միջոցառումը նաեւ լավ առիթ է հայկական պատմամշակութային հարուստ ժառանգությանը տեղում ծանոթանալու համար:
Հանդիպմանը ՄԱԿ-ի ԶՀԿ գլխավոր քարտուղար Թալեբ Ռիֆաին Նախագահ Սարգսյանին ներկայացրել է Հայաստանում զբոսաշրջության զարգացման ուղղությամբ ԶՀԿ-ի հետ փոխգործակցությամբ մինչ այժմ իրականացված ծրագրերը՝ ընդգծելով, որ այդ փոխգործակցությունը շարունակելու եւ ավելի ամրապնդելու համար լավ հիմքեր են ստեղծված: Նրա գնահատմամբ, վերջին մի քանի տարիներին զգալի առաջընթաց է արձանագրվել ենթակառուցվածքների բարելավման ուղղությամբ՝ սկսած օդանավակայանից: Թալեբ Ռիֆաին ՀՀ Նախագահի հետ հանդիպմանն իր պատկերացումներն ու առաջարկություններն է ներկայացրել Հայաստանի զբոսաշրջային ներուժի լիարժեք օգտագործման եւ երկիրն իր բոլոր առավելություններով ու գրավչությամբ ներկայացնելու ուղղությամբ իրականացվելիք աշխատանքների վերաբերյալ:
