Այս կառավարության ծրագրով տնտեսվարող սուբյեկտը, արժեք ստեղծող սուբյեկտը առաջին անգամ շատ կարեւորվում է։ Այս մասին NEWS.am-ի հետ զրույցում ասաց ՀՀԿ խմբակցության պատգամավոր, գործարար Գարեգին Նուշիկյանը։
«Առաջին անգամ ընդունվում է, որ գործարար աշխարհը տնտեսվարողը պետության հենասյուներից մեկն է, երեւի թե բանակից հետո ամենակարեւորը եւ կառավարությունն ամեն ինչ պետք է անի, որ տնտեսվարողի համար ստեղծի լավ պայմաններ։ Ներդրումներ անեն, աշխատատեղեր ստեղծեն։ Մենք ուղղակի այլ ելք չունենք, տարբերակ չունենք։ Նախորդ կառավարության ծրագրերի մեջ իմ նշված հարցերը չեն եղել տնտեսվարողի հետ կապված»,-ասաց պատգամավորը։
Այն հարցին, որ այս փոփոխությունենրը հռչակած իշխանությունը քաղաքացուն հայտնի է որպես խոստումներ չիրականացած ուժ, ինչը բազմիցս ապացուցվել է, ի՞նչ երաշխիք, որ նախանշած քայլերը կիրականացվեն, պատասխանեց։ «Երաշխիքը ժամանակն է, վեց ամսվա ընթացքում ականատես կլինենք ուղղակի ծրագրի իրականացմանը։ Ինչ վերաբերում է չիրականացածին, մի մասը օբյկտիվ, մի մասը սուբյեկտիվ պատճաներով չեն իրականացել։ Օրինակ, մեր երկրի պաշտպանության մասով իրականացել է»։
ՀՀԿ խմբակցության պատգամավորը շեշտեց, որ ծրագրում նշված կետերը իրականանալու հույսեր ներշնչում են հենց այն փոփոխությունները, որոնք տեղի ունեցան կառավարության կազմում։
«Համենայնդեպս, այն փոփոխություններն ու ուղղվածությունները, որ եղան ու նշված են կառավարության ծրագրի ու կամքի մեջ, գերատեսչություններում, կարծում եմ, մեծ ազդակ է, որ էս ծրագիրը եթե ոչ հարյուր տոկոսով, գոնե 60-70 տոկոսով հնարավոր է իրականացնել»,-ասաց նա։