Թուրքիայի նախագահ Թայիփ Էրդողանը ու ԱՄՆ պաշտպանության նախարար Էշթոն Քարթերը Անկարայում բանակցությունների ժամանակ պայմանավորվել են «զարգացնել ու համախմբել հաջողությունները» ԻՊ ահաբեկչական խմբավորման դեմ պայքարում «Եփրատի վահան» գործողության շրջանակում։ Այս մասին հայտնել է Պենտագոնի պաշտոնական ներկայացուցիչ Փիթեր Կուկը, փոխանցում է «ՌԻԱ Նովոստին»։

«Նախարարը շնորհակալություն է հայտնել նախագահին ՝ ահաբեկչության դեմ պայքարում Թուրքիայի վճռականության ու Իրաքում ու Սիրիայում ԻՊ դեմ արշավին աջակցելու համար։ Կողմերը քննարկել են ԻՊ դեմ վերջին առաջխաղացումները «Եփրատի վահան» գործողության շրջանակում»,- նշել է Կուկը։ Նրա խոսքով, ԱՄՆ պաշտպանության նախարարը շնորհակալություն է հայտնել Էրդողանին այն «կրիտիկական դերի համար, որը Թուրքիան կատարել է սիրիական ընդդիմության ուժերով Դաբիկ քաղաքի ազատագրման գործում»։

Կուկը նշել է, որ կողմերը քննարկել են «Եփրատի վահան» գործողության շրջանակում հաջողությունները զարգացնելու ու համախմբելու անհրաժեշտությունը, այդ թվում զինվորականների մակարդակով համագործակցության զարգացման, նաեւ քաղաքացիական ու հումանիտար գործողությունները ընդլայնելու ճանապարհով։

Անկարա կատարած այցի ընթացքում Քարթերը Էրդողանից բացի հանդիպել է նաեւ Թուրքիայի վարչապետ Բինալի Յընդըրիմի ու իր թուրք գործընկեր Ֆիկրի Իշիկի հետ։

Կայացած բանակցությունները Պենտագոնը արդյունավետ է անվանել։ Նշում են, որ Քարթերը «հաստատել է իր աջակցությունը ԱՄՆ-ի ու Թուրքիայի միջեւ երկարաժամկետ ռազմավարական դաշինքին»։

Թուրքիայի բանակը օգոստոսի 24-ին սկսել էր ԻՊ դեմ «Եփրատի վահան» գործողությունը, սիրիական ընդդիմության մասնակցությամբ գրավել է սահմանամերձ Ջարաբլուս քաղաքը Սիրիայի հյուսիսում ու շարունակում է գրոհել հարավ-արեւմտյան ուղղությամբ։ Էրդողանի խոսքով գործողության նպատակն է ահաբեկիչներից ազատել 5 հազար քառակուսի կմ տարածք ու այնտեղ անվտանգության գոտի ստեղծել փախստականների համար։