Ֆրանսիայի Ազգային կրթության եւ բարձրագույն ուսման նախարար Նաժատ Վալո-Բելքասեմը օրեր առաջ հանդես է եկել նախաձեռնությամբ՝ ուսումնասիրելու համար ցեղասպանությունները եւ զանգվածային ոճիրները, նպատակ ունենալով նրանց լավագույնըմբռնումը, ինչպես նաեւ ժխտողականության դեմ պայքարը: Այս մասին գրել է Ֆրանսիայում լույս տեսնող «Հառաջ» թերթը:
Այս առաքելությունը, որը ստեղծվում է Հայոց ցեղասպանության 100-րդ տարելիցից մեկ տարի անց, վստահված է Ազգային կրթության ընդհանուր քննիչ Վենսան Դյուքլերին:
Նա պետք է գլխավորի 12 տարբեր երկրների քաղաքացիներից բաղկացած 46-հոգանոց խումբը: Առաքելության անդամները պատմության, սոցիոլոգիայի, մարդաբանության մասնագետներ են, բարձրագույն ուսումնական հաստատությունների դասախոսներ, իրավաբաններ, լրագրողներ կամ հոգեվերլուծաբաններ:
Խումբը պետք է ցեղասպանությունների եւ զանգվածային ոճիրների մասին տեղեկագիր պատրաստի, որպեսզի հնարավոր լինի դյուրացնել դրանց ըմբռնումը եւ կանխարգելման նոր ձեւեր ստեղծել:
Առաքելությունն իր եզրակացությունները պետք է ամփոփի մեկ տարվա ընթացքում:
Ֆրանսիայի ազգային կրթության նախարարը նշել է, որ սրանով ուզում է «արդար հիշողության քաղաքականություն» վարել, հավելելով, որ այս ժամանակաշրջանում, երբ ժխտողականությունը իրականություն է եւ բարգավաճում է, մոռացության դեմ պայքարում անցյալի փոխանցումը հրամայական պահանջ է դառնում:
