Բանակցությունների օրակարգում Լեռնային Ղարաբաղի կարգավիճակի ու ինքնորոշման հարցն է, բոլոր մնացած հարցերը դրանից են բխում։ Այս մասին NEWS.am-ի թղթակցի հետ զրույցում ասել է «Հանրապետական» խմբակցության ղեկավար Վահրամ Բաղդասարյանը։

Նրա խոսքով Վիեննայում ու Սանկտ Պետերբուրգում հանդիպումների ժամանակ ձեռքբերված պայմանավորվածությունները խախտել է միայն Ադրբեջանի նածխագահ Իլհամ Ալիեւը։ «Նրա բոլոր հայտարարություններն ողղված են միայն սեփական ժողովրդին շեղելուն, իրեն նրա առաջ արդարացնելուն։ Եվ ԵԱՀԿ Մինսկի խմբի համանախագահ երկրների ղեկավարների ներկայությամբ էլ արձանագրվել է, որ մեր դիրքորոշումը հետեւյալն է՝ մենք չենք կարող խոսել որեւէ այլ խնդրի մասին, քանի դեռ չի լուծվել Լեռնային Ղարաբաղի կարգավիճակի հարցը»,- շեշտել է Վահրամ Բաղդասարյանը։ Միայն Լեռնային Ղարաբաղի կարգավիճակի մասին հարցի վերջնական լուծումից հետո, հավելեց պատգամավորը, հնարավոր կլինի խոսել մնացած բոլոր խնդիրների մասին։

Հիշեցնենք, որ հոկտեմբերի 25-ին Երեւանում մամուլի ասուլիսի ժամանակ ԵԱՀԿ Մինսկի խմբի համանախագահ Ջեյմս Ուորլիքը հայտնել է, որ Ադրբեջանի նախագահ Իլհամ Ալիեւը սկսել է քննարկում Լեռնային Ղարաբաղի կարգավիճակի մասին ու կոչ է արել ողջունել այդ քայլը։