«Ալաշկերտ» ֆուտբոլային ակումբի կիսապաշտպան Արթուր Եդիգարյանը մեկ տարուց ավել է չի հրավիրվում ազգային հավաքական: Նախորդ երկու մարզիչները՝ Սարգիս Հովսեփյանն ու Վարուժան Սուքիասյանը նրան չէին հրավիրում: Լրագրողների հարցերին պատասխանում էին, որ չի համապատասխանում հավաքականին, թեեւ ֆուտբոլիստը գտնվում էր լավ մարզավիճակում: Մոնտենեգրոյի խաղից առաջ Արթուր Պետրոսյանը լրագրողների հարցին պատասխանեց, որ հանդիպել է Եդիգարյանի հետ, եւ շուտով նա հնարավոր է հրավիրվի հավաքական:

Այս առնչությամբ, NEWS.am-ի թղթակից Վերա Մատիրոսյանը զրուցեց Արթուր Եդիգարյանի հետ:

Արթուր, ի՞նչ ասաց քեզ Արթուր Պետրոսյանը հանդիպման ժամանակ:

Մենք հանդիպեցինք «Բանանց» – «Ալաշկերտ» խաղից հետո: Հետեւում էր մեր խաղին: Ասաց, որ կարեւորը ես լինեմ լավ մարզավիճակում ու հավաքականում խաղամ իմ դիրքում՝ հենակետային, այլ ոչ թե ինչպես այժմ թիմում եմ խաղում ենթահարձակվողի դիրքում:

Ստացվում է, որ հաջորդ խաղին քեզ կտեսնե՞նք:

Դե եթե լավ մարզավիճակում լինեմ, ենթադրում եմ՝ այո:

Դուք Արթուր Պետրոսյանի հետ աշխատել եք դեռեւս, երբ նա Բերնար Շալանդի օգնական էր: Ինչպիսի՞ն է նա:

Դե առաջնայինը նրա մոտ մարդկային հարաբերություններ են, հետո մտածում ես  նրա մարզիչ լինելու մասին: Նա շատ լավ է տրամադրված ու դա հաստատ փոխադարձ է: Որպես մարզիչ նա արդեն մեծ փորձ է ձեռք բերել: Տասը տարի Շվեյցարիայում աշխատելը իզուր չի անցել:

Ի՞նչ տպավորություն ստացար Մոնտենեգրոյի հետ խաղից:

Շատ լավ: Երեք տարի հաղթանակ չէինք տոնել:

Կարելի՞ է ասել, որ մենք պայքարի մեջ ենք այս խմբում:

Ղազախստանին որ հաղթենք, արդեն միավորների տարբերությունը կկրճատվի ու պայքարի մեջ կլինենք:

Վերա Մարտիրոսյան