Չեմ կարծում, որ ԵԽԽՎ սառեցված հակամարտությունների ենթահանձնաժողովը արդյունավետ կգործի։ Այս մասին նոյեմբերի 18-ին՝ խորհրդարանական ճեպազրույցների ժամանակ, ասել է ՀՅԴ խմբակցության ղեկավար Արմեն Ռուստամյանը։
Նրա խոսքով՝ ենթահանձնաժողովի նախագահ Ստեֆան Շեննահն անպայման ուզում է ինչ–որ բան ղեկավարել։ Սակայն այդ ենթահանձնաժողովը ոչ մի բանի չի հասել, քանի որ չի կարող աշխատել։ «ԵԽԽՎ մոնիթորինգի հանձնաժողովը նիստերն անցկացնում է փակ ռեժիմով, բայց քանի որ ադրբեջանական մամուլն անդրադարձել էր այդ հարցին, ես կասեմ. այո, մենք դեմ ենք եղել այդ ենթահանձնաժողովի աշխատանքին, քանի որ մեզ համար կար անընդունելի ձեւակերպում. «Լեռնային Ղարաբաղն ու մնացած օկուպացված շրջանները»։ Մենք ասում ենք, որ այդպիսով անհնար է ապահովել հարցի ադեկվատ քննարկումը»,– ասաց պատգամավորը։
Ռուստամյանը նշեց, որ Շեննահը հայտարարել է, որ երկու կողմն էլ համաձայնել են քննարկել Ղարաբաղի հարցն այդ ձեւաչափով։ «Ահա դա սադրանք է։ Մենք հայտարարել ենք, որ իմաստ չենք տեսնում այդ ձեւաչափով հարցը քննարկելու մեջ։ Մենք պահանջ ենք ներկայացրել, որ ցանկացած հակամարտություն կարող է քննարկվել երկու կողմերի համաձայնության առկայությամբ»,– ընդգծել է Արմեն Ռուստամյանը։
«Հայկական կողմն օրինական իրավունք ունի հրաժարվել այդ քննարկումներից։ Այդ գործընթացները չպետք է հակասեն Մինսկի գործընթացին, պետք է ճիշտ գնահատել Եվրոպայի խորհրդի դերն այդ հակամարտության մեջ»,– ամփոփեց Ռուստամյանը։