Ինչի՞ եք սեղմում պատգամավորին, որ սեղմում եք, էներգիան ուրիշ տեղից դուրս կգա: Այս մասին, այսօր՝ նոյեմբերի 29-ին, ԱԺ-ում ԱԺ կանոնակարգ-օրենքում փոփոխություններ կատարելու մասին նախագծի քննարկման ժամանակ նշել է ՀԱԿ խմբակցության պատգամավոր Հրանտ Բագրատյանը:
«ԱԺ հիմքը պատգամավորն է, դուք բռնել եք պատգամավորին անընդհատ նեղել եք, մինչդեռ կառավարության ներկայացուցիչներին 40 րոպե, մեկ ժամ եք հատկացրել: Պատգամավորի խնդիրը խոսելն է, ի՞նչ 7 րոպե, 10 րոպե պետք է տալ: Ես չեմ հասկանում՝ 5 րոպեն ո՞րն է, բա պատգամավորին ընտրել են, մարդը պետք է կարողանա արտահայտվի, ինչի՞ եք սեղմում, որ սեղմում եք, էներգիան ուրիշ տեղ դուրս կգա։»,-ասաց նա՝ հավելելով. «Սահմանադրությամբ՝ այն, ինչ կոչվում է Ազգային ժողով, այնտեղ հիմնական ինստիտուտը պատգամավորն է, ոչ թե Ազգային ժողովի ապարատը, նախագահը, տեղակալը»:
Ըստ նրա՝ պատգամավորը պետք է ունենա նույնիսկ այնքան իրավունք խոսելու, որքան վարչապետը. «Հոդված 61-ն ընդհանրապես չեմ հասկանում։ Ինչպե՞ս կարող է խմբակցության ղեկավարը լիազորագրի հիման վրա՝ պատգամավորի տեղը քվեարկի։ Պատգամավորի տեղն ո՞վ կարա քվեարկի, ինչո՞ւ եք նման բանի գնում։ Կարծում եմ՝ մեծամասնությունն ուզում է՝ իրեն երաշխիքներ ստեղծի»։