Հայ-վրացական առեւտրատնտեսական համագործակցությունը պետք է հասցնել քաղաքական երկխոսության մակարդակին: Այս մասին, այսօր՝ նոյեմբերի 29-ին, Հայաստանի Հանրապետությունում Վրաստանի արտակարգ եւ լիազոր դեսպան Գիորգի Սագանելիձեի հետ հանդիպման ժամանակ նշել է ՀՀ վարչապետ Կարեն Կարապետյանը:
Կառավարությունից NEWS.am-ին հայտնում են, որ վարչապետ Կարապետյանը, բարձր գնահատելով Հայաստանի եւ Վրաստանի միջեւ քաղաքական երկխոսությունը, նշել է, որ պետք է ակտիվ աշխատել առեւտրատնտեսական համագործակցությունը եւս այդ մակարդակին հասցնելու եւ առկա ներուժը լիարժեք իրացնելու ուղղությամբ:
Գիորգի Սագանելիձեն ընդգծել է, որ հայ-վրացական հարաբերությունները հիմնված են երկու ժողովուրդների դարավոր բարեկամության վրա, եւ Վրաստանը կարեւորում է մեր երկրի հետ փոխշահավետ գործակցության զարգացումը:
Վարչապետը եւ ՀՀ-ում Վրաստանի դեսպանը քննարկել են երկու երկրների փոխգործակցության օրակարգին վերաբերող հարցեր: Զրուցակիցները, մասնավորապես, մտքեր են փոխանակել էներգետիկայի, տրանսպորտի, փոխադրումների եւ այլ ոլորտներում համատեղ ծրագրերի ընթացքի, ինչպես նաեւ հետագա անելիքների շուրջ: