Ղարաբաղյան խնդրով բանակցություններում հայկական կողմերի դիրքերն ավելի թույլ են, քան 90-ական թվականներին: Այս մասին այսօր՝ նոյեմբերի 30-ին, լրագրողներին ասաց ՀԱԿ խմբակցության ղեկավար Լեւոն Զուրաբյանը՝ պատասխանելով խորհրդարանի նախագահ Գալուստ Սահակյանի երեկվա հայտարարությանը, թե այդ ժամանակվա նախագահ, ՀԱԿ ներկայիս առաջնորդ Լեւոն Տեր-Պետրոսյանը պատրաստվում էր Ադրբեջանին տարածքներ հանձնել:
«Ակնհայտ է, որ 90-ական թվականներին Ադրբեջանի դիրքերն ավելի թույլ էին: Այդ ժամանակ Բաքուն պատրաստ էր եւ համաձայնել էր խաղաղ կարգավորման գործընթացին: Եվ Հայաստանը բանակցությունները վարում էր ուժեղ կողմի դիրքերից: Իսկ հիմա իր պայմաններն է թելադրում հենց Ադրբեջանը եւ չի համաձայնում նույնիսկ հայկական կողմին ոչ ձեռնտու փոփոխություններին: Այսպիսին է այսօրվա իրականությունը: Եթե ինչ-որ մեկը տարածքներ է հանձնում, ապա միայն ոչ բավարար տեղեկացված բանակցողները: Բանակցություններում նրանք (նկատի ունի այժմյան իշխանություններին - խմբ.) ելույթ են ունենում անհաշտ դիրքերից, իսկ գործով գործընթացը փակուղի են տանում»,- ասաց Զուրաբյանը: