Իսլամաբադը կողջունի ԱՄՆ ընտրված նախագահ Դոնալդ Թրամփի միջնորդությունը Հնդկաստանի հետ հարաբերությունների՝ այդ թվում քաշմիրյան խնդրի կարգավորման գործում, եթե Թրամփը հանդես գա նման առաջարկով։ Այս մասին հայտնել է Պակիստանի ԱԳՆ պաշտոնական ներկայացուցիչ Նաֆիս Զաքարիան ճեպազրույցի ժամանակ, փոխանցում է «ՌԻԱ Նովոստին»։
Պարբերականը հայտնում է, որ Զաքարիան հիշեցրել է, որ Թրամփը նախընտրական ժամանակաշրջանում մի քանի անգամ հայտնել է, որ պատրաստ է միջնորդ դառնալ Հնդկաստանի ու Պակիստանի հարաբերությունների կարգավորման գործընթացում։
«Մենք գնահատում ենք ԱՄՆ-ի հետ հարաբերությունները ու առաջընթացի հույս ունենք»,- հայտնել է Զաքարիան։
Նախօրեին Պակիստանի վարչապետ Նավազ Շարիֆի գրասենյակը նույնպես հայտնել էր, որ վարչապետը զանգահարել է Թրամփին ՝ հաղթանակի կապակցությամբ նրան անձամբ շնորհավորելու հ ամար։ Վարչապետի գրասենյակը հայտնել է, որ Թրամփը Շարիֆին անվանել է «հոյակապ տղա» ՝ «շատ լավ հեղինակությամբ»։ Նա Պակիստանը անվանել է հսկայական հնարավորություններով երկիր, հայտնել, որ պատրաստ է «խաղալ ցանկացած դեր, որը Շարիֆը կցանկանա, առկա խնդիրների լուծման համար»։ Թրամփը նաեւ Պակիստան այցելելու պատրաստակամություն է հայտնել։
Վարչապետի գրասենյակի ու պաշտոնական ներկայացուցչի հայտարարությունները համապատասխանում է Վաշինգթոնի հասցեին Իսլամաբադից վերջին ամիսներին հնչող հռետորաբանությանը։ Երկու երկրների հարաբերություններում բարդություններ էին սկսվել, երբ մայիսի 21-ին ԱՄՆ-ն ավիահարված է հասցրել Պակիստանի տարածքին՝ թալիբների առաջնորդ Ախթար Մանսուրին ոչնչացնելու նպատակով։ Իսլամաբադը քննադատել էր ԱՄՆ գործողությունները՝ ասելով, որ դա ոչ միայն խախտում է Պակիստանի ինքնիշխանությունը, այլեւ կարող է խոչընդոտել Աֆղանստանում խաղաղ գործընթացին։