Ծրագրավում բոլորը կարող են սովորել, եւ սխալ է այն կարծիքը, թե դա էլիտար մասնագիտություն է, կարծում է SoloLearn ընկերության հիմնադիր Եվա Հյուսյանը։ Ըստ նրա, մենք, հայերս, մեր ծնողներից գենետիկորեն ժառանգած բացառիկ ինժեներական տաղանդ ունենք, որը դեռ չենք կորցրել, եւ դա պետք է ճիշտ օգտագործել։
«Անկեղծ ասած՝ չգիտեմ ինչու է ծրագրավորումը համարվում էլիտար մասնագիտություն: Ես պնդում եմ, որ դա ավելի շուտ առասպել է, քան իրականություն: Իմ կարծիքով ծրագրավում բոլորը կարող են սովորել: Մենք մեր ծնողներից գենետիկորեն ժառանգած բացառիկ ինժեներական տաղանդ ունենք, որը դեռ չենք կորցրել: SoloLearn հարթակի գործունեության ողջ փիլիսոփայությունն էլ հենց այդ գաղափարի վրա է հիմնված՝ բոլոր ցանկացողներին տալ հնարավորություն սովորել ծրագրավորում, բայց որ ամենակարեւորն է՝ անել դա բացառապես հաճույքով»,- ասել է SoloLearn ընկերության հիմնադիր Եվա Հյուսյանը TEDxYerevanSalon միջոցառման շրջանակում NEWS.am–ի թղթակցի հետ զրույցում:
Նրա կարծիքով ՏՏ միանշանակ կարող են եւ արդեն հեղաշրջում են Հայաստանի տնտեսությունը: «Հիմա իսկապես հսկայական գործ է արվում ՏՏ-ի զարգացման եւ համապատասխան մեխանիզմների կիրառման հարցում: Միակ բանը, որ ըստ իս պակասում է, դա պետական միասնական մոտեցումն է, որ կկարողանար կոնսոլիդացնել ոլորտի ողջ ներուժը: Հիմա սեփական պրոդուկտներ ստեղծելու եւ դրանք դրսում վաճառելու հսկա պոտենցիալ կա երկրում»,- հավելել է նա:
SoloLearn հիմնադիրը կարծում է, որ ապագայում ծրագրավորման հիմնարար գիտելիքները պարտադիր են լինելու բոլորի համար՝ անկախ մասնագիտությունից: Այդ պատճառով SoloLearn-ն այժմ կրթական հարթակից վերածվել է ծրագրավորման սոցիալական ցանցի, որտեղ ծրագրավորում սովորողները կարող են շփվել միմյանց հետ, հարցեր տալ եւ որ ամենակարեւորն է՝ րոպեների ընթացքում ստանալ իրենց հուզող հարցերի պատասխանները:
Խոսելով վերջին մի քանի տարիների ընթացքում մեծ թափ ստացած ստարտափ շարժման մասին՝ Եվա Հյուսյանը նշել է, որ լավ կլիներ, եթե ստարտափերի թիվը է՛լ ավելի լիներ:
«Կարծում եմ ստարտափերի թիվը դեռ մի հարյուրով պետք է ավելի լիներ: Իրականում ստարտափ հիմնելիս պետք չէ մտածել ձախողվելու մասին: Ողջ աշխարհում հիմնադրված ստարտափերի միայն 3%-ն է հաջողում, մնացած 97%-ը դատապարտված են ձախողման: Դա նորմալ երեւույթ է: Պետք չէ վախենալ ձախողումից: Ձախողումը դրական փորձառություն է ձեռներեցի համար: Հաջողված 3%-ից գուցե 2%-ն էլ հետագայում դադարեն գոյություն ունենալ, սակայն այն 1% տոկոսի ստեղծած պրոդուկտը դառնում է երկրի այցեքարտ: Այսօր Skype-ը Էստոնիայի այցեքարտն է դարձել»,- եզրափակել է SoloLearn-ի հիմնադիրը:
Հիշեցնենք, որ դեկտեմբերի 3-ին Հայկական Բարեգործական Ընդհանուր Միության գլխամասային գրասենյակում կայացավ թվով 5-րդ՝ «իկիգաի»( Ikigai) խորագրով TEDxYerevanSalon միջոցառումը:
Սալոնի կազմակերպիչները հրավիրել էին հինգ կանանց, որոնք իրենց ոլորտներում հեղափոխական գործունեություն են իրականացնում: Միջոցառման ընթացքում իր հաջողության պատմությունով հանդես է եկել նաեւ SoloLearn ծրագրավորում սովորեցնող հարթակի հիմնադիր Եվա Հյուսյանը:
