«Բարգավաճ Հայաստան» կուսակցության նախկին առաջնորդ Գագիկ Ծառուկյանը, իր անձի հանդեպ ներկայիս հասարակական-քաղաքական պատվերը տեսնելով, ակտիվ քաղաքական կյանք վերադառնալու որոշում կընդունի: Այս մասին այսօր՝ դեկտեմբերի 5-ին կայացած մամուլի ասուլիսում հայտարարեց կուսակցության խորհրդարանական խմբակցության քարտուղար Վահե Էնֆիաջյանը:
Նրա խոսքով՝ վերլուծելով երկրում ստեղծված իրավիճակը, հասարակական պատվերը, քաղաքական իրավիճակը՝ Գագիկ Ծառուկյանն առաջիկայում հանդես կգա հայտարարությամբ: «Մենք Գագիկ Ծառուկյանի հետ առանձին զրուցել ենք, որի ընթացքում ներկայացրել ենք ԲՀԿ քաղաքական խորհրդի որոշումը եւ կոչը, որ նա վերադառնա եւ կուսակցության ղեկավարի կարգավիճակում ակտիվորեն ներգրավվի քաղաքական կյանքին»,- նշեց Էնֆիաջյանը՝ շարունակելով, որ Գագիկ Ծառուկլյանն այն անհատն է, որը մշտապես կանգնած է եղել ժողովրդի կողքին: «Ելնելով ներկայիս հասարակական-քաղաքական պատվերից՝ կարծում եմ, որ նրա որոշումը պետք է դրական լինի»,- ընդգծել է Վահե Էնֆիաջյանը:
Հիշեցնենք, որ «Բարգավաճ Հայաստան» կուսակցության նախկին առաջնորդը, որն անցյալ տարի քաղաքականությունից հեռացավ Սերժ Սարգսյանի խիստ քննադատությունից հետո, չի բացառել քաղաքական ասպարեզում ակտիվ գործունեությանն իր վերադարձի հավանականությունը: