Հայաստանի ու Եվրամիության միջեւ համաձայնագրի կնքման շուրջ բանակցությունները կառուցողական են, բայց դեռ բաց հարցեր են մնում։ Այս մասին NEWS.am–ի թղթակցի հետ զրույցում ասել է ԵՄ պատվիրակության ղեկավար դեսպան Պյոտր Սվիտալսկին։
Նրա խոսքով, բանակցությունների հաջորդ փուլը կկայանա դեկտեմբերի 9-ին Երեւանում։ «Մենք բանակցությունների լավ փուլ ենք անցկացրել, մեծ առաջընթաց է գրանցվել։ Ես մեկ ամսից նոր կկարողանամ ասել, թե որտեղ ենք գտնվում ու համաձայնագիրը կնքելու ինչ հեռանկարներ կան։ Բայց մենք բավականին լավատեսաբար ենք տրամադրված բանակցությունների արդյունքների հարցում»,- նշել է Պյոտր Սվիտալսկին։
Այն հարցին, թե մոտավորապես երբ կստորագրվի Հայաստան-ԵՄ նոր համաձայնագիրը, դեսպանը պատասխանել է․ «Եկեք այդ մասին խոսենք բանակցությունների հաջորդ փուլից հետո։ Ես հիշում եմ, նախարար Նալբանդյանը հայտնեց, որ եւս 2 փուլ կարող է անհրաժեշտ լինել։ Բանակցությունների հիման վրա ես կարող եմ ասել, որ ապագա համաձայնագրի շատ տարրեր արդեն համաձայնեցված են։ Այդուհանդերձ, դեռ կան բաց հարցեր, հետեւաբար, կարող են անհրաժեշտ լինել լրացուցիչ ջանքեր»։
Հիշեցնենք, որ Հայաստանի փոխարտգործնախարար Կարեն Նազարյանը հայտնել էր, որ հնարավոր է գալիք տարվա առաջին եռամսյակում կհաջողվի ավարտել Հայաստան-ԵՄ համաձայնագրի կնքման շուրջ բանակցությունները։