Անհրաժեշտ է համակարգված աշխատել՝ ԱՄՆ-ում հայկական շահերը ներկայացնելու եւ Արցախին համակողմանի աջակցություն ցուցաբերելու հարցում: Այս մասին, Վաշինգթոն կատարած իր աշխատանքային այցի շրջանակներում, դեկտեմբերի 5-ին հայտարարել է Արցախի Հանրապետության վարչապետ Արայիկ Հարությունյանը՝ Ամերիկայի հայկական համագումարի եւ Ամերիկայի Հայ դատի հանձնախմբի ղեկավարների հետ հանդիպման ժամանակ:
ԼՂՀ կառավարությունից NEWS.am-ին հայտնում են, որ Արայիկ հարությունյանը նրանց հետ քննարկել է համահայկական նշանակության եւ Արցախին վերաբերող հարցերում համագործակցության խորացման հեռանկարները: Ա. Հարությունյանը կարեւորել է երկու կազմակերպությունների դերակատարումը Արցախի վերաբերյալ ԱՄՆ պետական մարմինների որոշումների կայացման եւ իրազեկվածության բարձրացման գործում:
Կողմերը շեշտադրել են ԱՄՆ-ում հայկական շահերը ներկայացնելու եւ Արցախին համակողմանի աջակցություն ցուցաբերելու հարցում համակարգված աշխատանքների կազմակերպման անհրաժեշտությունը:
Վարչապետն այնուհետեւ մասնակցել է ԱՄՆ-ում ՀՀ դեսպանատանը կազմակերպված ընդունելությանը, որին մասնակցում էին նաեւ հոգեւոր դասի, հայկական համայնքի ներկայացուցիչներ, ինչպես նաեւ օտարերկրյա հյուրեր: ԱՄՆ-ում ՀՀ արտակարգ եւ լիազոր դեսպան Գրիգոր Հովհաննիսյանը ողջունել է Արայիկ Հարությունյանին՝ կարեւորելով նրա այցը Սփյուռքում եւ ԱՄՆ պետական շրջանակներում Արցախի վերաբերյալ իրազեկվածության բարձրացման գործում: Վարչապետն իր ելույթում համառոտակի ներկայացրել է ԼՂՀ պետականաշինության, տնտեսության զարգացման եւ անվտանգության ապահովման գործընթացները: Նա ընդգծել է Արցախի զարգացման եւ միջազգային ներկայացվածության գործում Սփյուռքի բացառիկ մասնակցության նշանակությունը՝ միջոցառման մասնակիցներին հորդորելով հնարավորինս աջակից լինել հայրենիքի խնդիրների լուծմանը:
Ա. Հարությունյանը նաեւ պատասխանել է ներկաներին հուզող մի շարք հարցերի, որոնք վերաբերում էին Արցախի տնտեսությանը, արտաքին քաղաքականությանը, պաշտպանության համակարգին, ղարաբաղյան հակամարտության կարգավորման գործընթացին եւ այլ ոլորտների:
