Պետքարտուղարության պաշտոնական ներկայացուցիչ Մարկ Թոները մեկնաբանել է ՄԱԿ-ում ԱՄՆ-ի մշտական ներկայացուցիչ Սամանտա Փաուերի ելույթը, որում նա հիշատակել է Հայոց ցեղասպանության ժխտման մասին:
Նրա խոսքով՝ Փաուերի նշումը անհրաժեշտ է դիտարկել Հոլոքոսթի տեղեկացվածության մեծացման ուղղությամբ Էլի Վիզելի ջանքերին տուրք տալու ենթատեքստում: «Եվ, իհարկե, նրա նշումը չի վկայում վարչակազմի քաղաքականության որեւէ փոփոխության մասին»,- հայտարարել է Թոները Վաշինգթոնում կայացած ճեպազրույցում:
Ի պատասխան հարցին՝ ինչո՞ւ վարչակազմը չի օգտագործում «ցեղասպանություն» տերմինը, Թոները նշել է, որ նախագահը, ներկայիս վարչակազմը, ինչպես, ի դեպ, նաեւ նախորդը, բազմիցս ընդունել է այն փաստը, որ Օսմանյան կայսրության վերջին օրերին 1,5 մլն հայեր սպանվել են կամ մահվան են ուղարկվել: ԱՄՆ-ը նաեւ տեղի ունեցած փաստի ամբողջական եւ բացահայտ ընդունման կոչ է անում: «Մեր քաղաքականությունն այսպիսին է մնում: Ես չեմ ուզում տերմիաբանության մեջ խորանալ կամ՝ թե մենք ինչպես ենք այդ իրադարձությունները հիշատակել»,- հավելել է Թոները:
Պետքարտուղարության ներկայացուցիչը չի պատասխանել հարցին՝ արդյոք Թուրքիայի հետ հարաբերությունները ազդո՞ւմ են «ցեղասպանություն» բառն արտաբերելու վրա: