ՀՅԴ-ի հետ դաշինք կազմելու քննարկումներ այս պահին չկան: Այս մասին այսօր՝ դեկտեմբերի 7-ին, Ազգային ժողովում լրագրողների հետ զրույցում նշել էէ ՀՀԿ խմբակցության ղեկավար Վահրամ Բաղդասարյանը:
«Դաշնակցությունը» մեր կոալիցիոն գործընկերն է եւ «Դաշնակցությունը» նման ցանկություն չի հայտնել, ոչ էլ մենք ենք հայտնել: Չի բացառվում, որ քաղաքական կոնսուլտացիաներ լինեն նաեւ մեր միջեւ: Եթե կլինի նման ցանկություն քաղաքական ուժերի կողմից մենք կողմ ենք: Բայց նման որոշում դեռ չկա»,-ընդգծեց Բաղդասարյանը:
Անդրադառնալով Սերժ Սարգսյանի ՀՀԿ ցուցակը գլխավորելուն, նա ասաց. «Սերժ Սարգսյանը մեր կուսակցության առաջնորդն է: Դա արդեն հուշում է, որ նա է գլխավորելու ցուցակը: Խորհրդի նիստին կորոշվի, բայց Սերժ Սարգսյանը մեր կուսակցության առաջնորդն է եւ որեւէ հիմք չկա, որ առաջնորդը չգլխավորի ցուցակը»:
Ինչ վերաբերում է վարչապետ Կարեն Կարապետյանի հայտարարությանը, թե ՀՀԿ անդամակցությունը բացասաբար է ազդել իր վարկանիշի վրա, ՀՀԿ խմբակցության ղեկավարը նշեց, որ դա ժամանակավոր բնույթ կկրի. «Ընդհանրապես մեր իրականության մեջ հանրության հավատը ավելի բարձր է անկուսակցական գործիչների նկատմամբ, առավել եւս վարչապետի պոստում: Երբ վարչապետն անկուսակցական է, քաղաքացիական հասարակությունը կամ այլ կուսակցություններից անդամներ նրան ավելի շատ են հավատում: Երբ որևէ գործիչ անդամակցում է որևէ կուսակցության, հավատը նվազում է, իսկ նրանք մեր քաղաքացիներն են»:
Նրա խոսքով, Կարեն Կարապետյանը իրականացնում է ՀՀԿ-ի ծրագրերը. «Բնականաբար կառավարության ծրագրերը բխում են ՀՀԿ-ի, Հանրապետության նախագահի նախընտրական ելույթներից, դրա համար ավելի հեշտ կլինի այդ ծրագրերը իրականացնել: Ինձ թվում է, այս իրավիճակում բոլոր քաղաքական պաշտոն զբաղեցնող մարդիկ պետք է վերջիվերջո որոշեն իրենց կուսակցական պատկանելիությունը: Դա իմ անձնական կարծիքն է: Իսկ ինչ մնում է իմիջի իջելուն կամ բարձրանալուն, դա շատ արագ կարող է փոփոխվող լինել եւ աշխատանքի իրականացման արդյունքում հանրությունը տա իր գնահատականը: Ինձ թվում է այդ ժամանակավոր կորուստը, որն նաեւ նկատել է վարչապետը, շատ արագ վերականգնվող են»,-ասաց Վահրամ Բաղդասարյանը:
