Հայաստանը կարող էր միանալ ԵԱՀԿ Մինսկի խմբի եռանախագահող երկրների ԱԳ նախարարների նախօրեին արված հայտարարությանը, սակայն դա կլիներ 3+1, քանի որ Ադրբեջանը չէր միանա: Այս մասին այսօր՝ դեկտեմբերի 9-ին, Համբուրգում ԵԱՀԿ արտգործնախարարների խորհրդի նիստի արդյունքում կայացած ճեպազրույցի ընթացքում ասել է ՀՀ արտաքին գործերի նախարար Էդվարդ Նալբանդյանը:
Հարցին, թե արդյոք առաջարկ եղել է, որ հայտարարությանը միանան նաեւ Հայաստանի ու Ադրբեջանի ԱԳ նախարարները, նալբանդյանը պատասխանեց. «Բայց Ադրբեջանը արդյոք կարո՞ղ էր միանալ այն հայտարարությանը, որը նախօրեին արեցին եռանախագահող երկրների ԱԳ նախարարները, իհարկե ոչ: Մենք կարող էինք միանալ, բայց դա կստացվի 3+1: Դա է պատճառը, որ Ադրբեջանի մոտեցումները երկար ժամանակ հակասում են միջազգային հանրության դիրքորոշումներին: Դա չի նշանակում, որ պետք է հուսահատվել, միշտ պետք է տրամադրվել, որ պետք է շարունակել բանակցային գործընթացը, դա այլընտրանք չունի: Հայաստանը շարունակելու է եռանախագահող երկրների հետ համատեղ ջանքերը՝ ուղղված հիմանխնդրի խաղաղ կարգավորմանը»:
