Տեղեկատվական տեխնոլոգիաների ոլորտը երկրի ինովացիոն զարգացման հրաշալի գործիք է, բայց այն չպետք է փակի Հայաստանի ողջ ինովացիոն դաշտը, կարծում է ՀՀ տնտեսական զարգացման եւ ներդրումների նախարարության Տեխնոլոգիական զարգացման վարչության ղեկավար Ռուբեն Գեւորգյանը։
«Ես ՏՏ-ն դիտարկում եմ երկու տեսանկյունից՝ նախ որպես առաձին ոլորտ, որ ոչնչով չի տարբերվում մնացած բոլոր ոլորտներից եւ երկրորդը՝ որպես հրաշալի գործիք՝ այլ՝ ինովացիոն ներուժ ունեցող ոլորտների զարգացման համար»,- ասել է նա «Հայաստանի ինովացիոն զարգացման գործընթացը» աշխատաժողովի շրջանակում:
Տեխնոլոգիական զարգացման դեպարտամենտի ղեկավարի կարծիքով՝ ինովացիաների մասին խոսելիս՝ պետք է հասկանալ, թե ինչպես կիրառել ՏՏ ոլորտի գրանցած հաջողությունները՝ ինովացիոն ներուժ ունեցող այլ ոլորտների խթանման համար:
«Կան սուբյեկտներ, որոնք, ոգեւորվելով ՏՏ-ի հաջողողւթյուններից, իրենց թույլ են տալիս պնդել, որ մենք մեր ամբողջ ջանքերը պետք է կենտրոնացնենք այս ոլորտի վրա, քանի որ այն ի վիճակի է ամբողջությամբ փակել Հայաստանի ողջ ինովացիոն դաշտը: Բոլոր նրանք, ովքեր պատկերացնում են՝ ինչ է ինովացիան, հասկանում են, որ սա սխալ լոբբինգ է: ՏՏ-ն, իհարկե, հրաշալի ոլորտ է, սակայն այն պետք է դիտարկել մյուս ոլորտները զարգացնելու համար գործիք»,- հավելել է Ռուբեն Գեւորգյանը: