Ազգային ժողովն այսօր` դեկտեմբերի 16-ին, երկրորդ ընթերցմամբ ընդունեց «Գնումների մասին» օրենքի նախագիծը:
Մինչեւ քվեարկությունը Արամ Մանուկյանը հայտարարեց, որ օրենքների արագ բերելու պատճառով իրենք չեն հասցնում նորմալ ծանոթանալ նախագծերին:
«Խնդրում եմ ճշտել, ըստ մամուլի տեղեկատվության, այս օրենքի նախագծով Ազգային ժողովի նախագահի, վարչապետի եւ Հանրապետության նախագահի արարողակարգային ծախսերը համարվելու են պետական գաղտնիք եւ չեն լինելու թափանցիկ: Եթե մենք սխալ ենք հասկացել, որեւէ մեկը թող ճշտի»,- ասաց ՀԱԿ պատգամավորը:
Ազգային ժողովի նախագահը խոստովանեց. ինքն այդ մասին տեղյակ չէ, այսօր առավոտյան է թերթից կարդացել. «Նման բան Ազգային ժողովի չկա ու չկա»:
Գալուստ Սահակյանը պատասխանը ծիծաղ առաջացրեց դահլիճում: ՀՀԿ-ական Վարդան Այվազյանը պարզաբանեց. փակ է լինելու միայն արարողակարգի գնումները:
«Եթե մամուլին հավատում եք, հավատացեք նաեւ օրենքին: Մեկ ամիս է` կա այս նախագիծը, արդեն երրորդ ընթերցում ենք գնում, զուտ արարողակարգի մասին է, թե որ ռեստորանում է պետք հաց ուտել...»,- ասաց Վարդան Այվազյանը:
Ներկա պատգամավորները սկսեցին տեղից աղմկել, ԱԺ նախագահը հանգստացրեց. ինքն այդ մասին խոստանում է տեղյակ պահել. «Ես որեւէ բան չեմ տեսնում»:
Նախագծին կողմ քվեարկեց 77, ձեռնպահ 22 եւ դեմ 2 պատգամավոր:
