ՌԴ նախագահ Վլադիմիր Պուտինը առաջվա պես համարում է, որ ԽՍՀՄ փլուզումը ամենամեծ աշխարհքաղաքական աղետն է եղել երկրի պատմության մեջ, հայտնել է նախագահի մամուլի քարտուղար Դմիտրի Պեսկովը «Միր» հեռուստաալիքին տված հարցազրույցում։
«Դա աղետ էր, որը զգալիորեն հետ է մղել մեր զարգացումը։ Բոլոր երկրները, որոնք այսօր անկախ են, Խորհրդային միության փլուզումից հետո փաստացի մի քանի տասնամյակով հետ են ընկել իրենց զարգացումով»,- ասել է Պեսկովը, փոխանցում է Lenta–ն։
Նա հավելել է, որ հիմա «անհնար է խոսել ինչ -որ ռեվերսային գործըթացների մասին»։ Ընդ որում նա հավելել է, որ Ռուսաստանն ունի «նախկին Խորհրդային միության տարածքում նոր ինտեգրման պահանջ»։
«Եվ այս տեսակետից մենք հենց ԱՊՀ-ն ենք պատկերացնում։ Այո, դա ինտեգրման շատ բարդ, խրթին գործընթաց է, բայց այն այլընտրանք չունի մեզ համար։ Մենք տեսնում ենք, որ ԱՊՀ հողի վրա հասունանում են ավելի դինամիկ, ավելի սերտ փոխգործակցության ձեւաչափեր, ինչպես ԵՏՄ-ն, դրա համար էլ այդ նոր ինտեգրման տրամաբանությունը գերիշխող է»,- հավելել է նա։
