ԵԱՀԿ ՄԻնսկի խմբի ամերիկացի համանախագահ Ջեյմս Ուորլիքը խորապես ցավում է այսօր հայ-ադրբեջանական սահմանին արձանագրված զոհերի համար եւ ցավակցում նրանց ընտանիքներին:
NEWS.am -ի թղթակցի խնդրանքով մեկնաբանելով դեկտեմբերի 29-ի առավոտյան Ադրբեջանի կողմից իրականացված դիվերսիան, Ուորլիքը նշել է, որ այս նոր բախումները մատնանշում են բանակցային կարգավորման ուղղությամբ քայլերի կարեւորությունը, ինչը կբերի տեւական խաղաղության հաստատման տարածաշրջանում:
«Ինչպես նշել ենք նախկինում, այս հակամարտությունը չի կարող ռազմական լուծում ունենալ»:
Ավելի վաղ հայտնել էինք, որ այսօր՝ դեկտեմբերի 29 ին վաղ առավոտյան ՀՀ Տավուշի մարզի Չինարի գյուղից դեպի հարավ արեւելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն ներթափանցման փորձ։ Ադրբեջանական զորքերի ձեռնարկած դիվերսիոն ներթափանցման փորձի հետեւանքով զոհվել են ավագ լեյտենանտ Շավարշ Մելիքսեթի Մելիքյանը, շարքայիններ Էդգար Գրիգորի Նարայանը եւ Էրիկ Գարիկի Աբովյանը։
Ադրբեջանական կողմն ունի յոթ զոհ։ Մեկ զինծառայողի մարմինը մնացել է Հայաստանի տարածքում։