ԱՄՆ-ի ու Ռուսաստանի ներկա հարաբերություններում կան «սառը պատերազմի» տարրեր, այս մասին NEWS.am –ի թղթակցի հետ զրույցում ասել է փորձագետ, Գերմանիայի արտաքին քաղաքականության միության Ռուսաստանի ու ԱՊՀ հետազոտական ծրագրերի հարցերով տնօրեն Ալեքսանդր Ռարը։
Նրա խոսքով, բոլոր կողմերից կիբերհարձակումներ են իրականացվում, ծավալվել է տեղեկատվական պատերազմ եւ քարոզչություն։
«Ես կարծում եմ, որ Դոնալդ Թրամփը, իրոք, կարող է փոխել աշխարհակարգը ու մերձենալ Ռուսաստանի հետ։ Դա է լինելու նրա քաղաքականության հիմնական նպատակներից մեկը»,- նշել է Ալեքսանդր Ռարը։ Հիմա, շարունակել է նա, տեղի է ունենում հետաքրքիր քաղաքական պայքար, տրանսատլանտյան վերնախավերը փորձում են Թրամփին «իրենց գիրկը վերցնել»։ «Նրանք պատրաստ են նրան լեգիտիմ նախագահ ճանաչել, չնայած ընտրություններին Ռուսաստանի ենթադրյալ մանիպուլացումներին, եթե նա իրեն քաղաքակիրթ պահի, հետեւի իր նախորդների քաղաքականությանը։ Նրանք պարզապես ուզում են ստիպել, որ Թրամփը գնա ազատական արժեքների, ՆԱՏՕ-ի քաղաքականության ավանդական ճանապարհով»,- ասում է Ալեքսանդր Ռարը։ Սակայն հասկանալի է, որ Եվրոպան արդեն առաջվանը չի լինի, նա թուլանում է։ «Դրա համար էլ կարող է ստեղծվել մի իրավիճակ, երբ պետք է փոխել խաղի կանոնները»,- շեշտել էԱլեքսանդր Ռարը։
